DAGHAN ang wala makahibawo nga si Atty. Rex Fernandez apo diay ni Hen. Potenciano Aliño, usa ka Katipunero.
Si Atty. Fernandez mao ang abogado nga nitabang sa mga Carbon vendor pagsang-at og kaso batok nilang Mayor Labella, Megawide, et. al sa miaging Agusto 25. Pagkaugma, gi-ambush siya ug namatay.
Si Potenciano kuyog sa iyang duha ka igsuon nga nangulo sa mga Katipunero sa Talisay kaniadtong Abril 2, 1898, nga nakig-engkuwentro sa mga sundawong Katsila.
Si Potenciano dunay makasaysayon ug mahinungdanong kabilin alang sa iyang pamilya ug gibilin sab ni Atty. Fernandez alang kanato.
Mao kini ang kanta nga “O Pilipinas.”
Gipahimuan kini og mas modernong tuno alang sa mga bag-ong henerasyon karon sa heritage hotel nga Palm Grass Hotel.
Gihimuan ang makasaysayong lyrics sa henerasyon ni Hen. Aliño gihimuan og bag-ong tuno nga gitukar sa Aggressive Audio.
Naila ang Aggressive Audio nga maoy nagpasikat sa “Ang Tigulang” ug “Liar-Evil.”
Awhagon ta mo sa pagtabang og share niining kabilin nga naa sa YouTube.
Search lang sa “O Pilipinas,” ang titulo mao kanta. Gi-upload kini sa Palm Grass Heritage Hotel.
Nindot kaayo ang maong kanta nga nakaingon ko, haom kaayo sa panahon karon dinhi sa Pilipinas. Basta moawhag ko kaninyo nga maminaw og maayo ug mosabot sa mga lyrics niini.
KP
Naminaw ko sa miaging gabii sa tribute nga gipahigayon Kilusang Pagbabago alang kang Atty. Fernandez.
Daghan kita og nasayran kabahin sa iyang kinabuhi dihang aktibo kaayo siya nga nagduso sa usa kalihokan nga nagsuporta kang Presidente Rodrigo Duterte. Bisan pa man og nausab ang iyang baruganan kabahin sa administrasyon, gihigugma siya sa mga tawo nga iyang na-organisa.
Nakahibalo na man kita nga ni-connect siya og balik sa iyang mga kauban nga nakigbisog alang sa human rights. Nagsugod kini dihang gidakop kuyog sa iyang pag-umangkon ang giingong UP 8. Mao kini silang walo ka mga tawo nga gidakop diha sa University of the Philippines Cebu Campus.
Ang laing mahinungdanon detalye sa maong tribute alang ni Atty. Fernandez mao ang pagpatukar sa bag-ong bersyon sa “O Pilipinas” sa pagsugod sa maong programa nga gipahigayon pinaagi sa Zoom. Tiaw mo bang mga sakop sa KP gikan sa Rehiyon 6, 7 ug 8 nanambong ug nisalmot.
Paghuman sa mga testimony, gipakita ang usa ka video ni Atty. Rex nga nikanta. Iyang gikanta ang orihinal nga tuno ang “O Pilipinas.” (DM nako sa @anol_cebu)