HABALHABAL driver namatay kay natusak sa mga bala human girapido sa wala mailhing gunman alas 11:00 sa buntag sa Dominggo, Agosto 29, 2021, sa Dumping Area, Purok 5, Brgy. Bagakay, Dakbayan sa Toledo.
Ang mga samad ni Rodrigo Fernandez, 40, minyo, taga Bry. Sinsin, Dakbayan sa Sugbo sama og agi sa tinahian kay sikit kaayo.
Base niini, nagtuo ang kapulisan nga KG9 submachine pistol ang gigamit sa killer.
Si Police Staff Sgt. Alfredo De Gracia, imbestigador sa Toledo Police Station nga nahinabi sa Superbalita Cebu, nagkanayon nga mamasahero si Fernandez sa nahisgutang lugar.
Sa iyang pagbalik, pag-abot sa dapit nga awaaw, kalit siya nga girakrakan sa paglabay na niya base sa iyang mga samad sa buko-buko.
Wala isalikway sa kapulisan nga duha ka mga tawo ang nihimo sa krimen.
Ang mga tawo sa lugar niingon nga human sa buto-buto, nabantayan nila nga dunay duha ka mga motorsiklo ang niagi gikan sa dapit diin nahitabo ang krimen.
Di pa masuta kon kadto ba ang mga killers kay walay nakakita.
Ang kapulisan nakarekuber sa crime scene sa 14 ka mga bala sa 9mm pistol.
Ang mga ig-agaw, mga tawo sa dapit, lakip sa mga tanod nibutyag nga nailang maldito ug gikahadlukan sa ilang lugar si Fernandez.
Duna kini asawa apan toa sa mga isla Camotes nagpuyo uban sa ilang walo ka mga anak.
Sumala ni De Gracia nga hayan gisundan o dunay look out sa krimen.
Makita sab nila sa crime scene nga daw dunay grabing kasuko ang mga mipatay kang Fernandez tungod kay giseguro siyang mamatay.
“Suko kaayo kay girapido KG9 sub-machine pistol gigamit sa pagpa-ambush kay natabastabas pagka-igo sagad sa buko-buko,” dugang ni De Gracia
Nakuhang impormasyon sa kapulisan nga duna say gikaaway si Fernandez sa ilang lugar.
Gani kanunay kini nga magdala-dala sa iyang armas sa pagpamasahero.
Dunay nakuhang .38 kalibreng revolver gikan sa iyang bag.
Gisubay sab sa kapulisan ang mga impormasyon nga si Fernandez dunay nahimong krimen sa ilang dapit.