HUBOG nga kusog nipadagan sa iyang motorsiklo patay human nabangga sa gikasugat nga Canter truck sa national highway sa Barangay Talaga, Lungsod sa Argao, alas 4:00 sa hapon niadtong Dominggo, Agosto 28, 2021.
Si Florencio Cuandot, 45, taga Brgy. Balisong, Argao, gideklarar nga dead-on-arrival (DOA) sa Vicente Sotto Memorial Medical Center (VSMMC).
Samtang, gibuhian sa kapulisan sa Lunes, Agosto 29, si Glicerio Plando, hingkod, drayber sa Canter truck nga dunay numero sa plaka nga JAC 5371 ug taga Dakbayan sa Mandaue, human sa panaghusay atubangan sa kapulisan ang duha ka habig.
Si Patrolman Godfrey Dacoma sa Argao Police Station nga nahinabi sa Superbalita Cebu, nagkanayon nga hubog si Cuandot nagmaniho sa iyang Honda XRM nga motorsiklo gikan nag-inom uban sa mga barkada sa ilang lugar.
Pagkahapon sa samang adlaw, matod ni Dacoma, si Cuandot magkuha unta sa iyang asawa busa nagdali sa pagpadagan sa iyang motorsiklo.
Gumikan sa kakusog sa iyang pagpadagan pagkurbada nga dan, wala makabawi sa manobela ug nibangga sa gikasugat nga Canter truck nga padulong sa Lungsod sa Alcoy.
Tungod sa kakusog sa impact, nalagpot si Cuandot ug nabalibali ang ubang parte sa lawas.
Matod ni Dacoma, ang mga nakasaksi ningbutyag nga paspas sa pagpadagan si Cuandot sa iyang motorsiklo ug nikawat kini sa pikas lane sa kurbada ug diretso kini nibangga sa truck.(GPL)