TIGGAMA og peke nga vaccination card ang nadakpan human sa gilusad nga entrapment operation sa mga sakop sa Carbon Police Station niadtong Lunes, Agosto 30, 2021sa dalan Sanciangko, Barangay Kalubihan, Dakbayan sa Sugbo.
Ang dinakpan giila nga si Clifford Susana Arcilla, 46, residente sa nahisgutang dapit.
Mga ebidensiya nga nahipos sa kapulisan mao ang laminator machine, usa ka roll sa plastic lamination film, blanko nga peke nga vaccination card ug usa ka fake vaccination card nga laminated ug aduna nay detalye sa nanag-iya niini.
Matod ni Police Lieutenant Albe Codilla, deputy chief sa Carbon Police Station, nga aduna silay nadawat nga text report nga nagbutyag nga adunay naghimo og fake vaccination card sulod sa Coast Pacific Building sa dalan Sanciangko.
Milusad og operasyon ang Carbon police ug nakonpirmar ang maong tighimo og peke nga vaccination card.
Ang mga operatiba nagpatuo nga customer ug nagpakaaron ingnon nga magpahimo og duha ka card bugti sa bayad nga P450.
Gipa-fill up sa papel alang sa kompletong detalye nga ibutang sa card niini.
Human sa maong proseso gipapaabot ang mga operatiba og usa ka oras aron ma-laminate ang card.
Mibiya una ang maong duha ka pulis ug mipahibawo ngadto sa ilang buhatan nga positibo ang maong illegal nga operasyon sa maong tighimo og peke nga vaccination card.
Sa pagbalik mikuyog ang hepe sa Carbon Police Station, Police Lieutenant Colonel Kenneth Paul Albotra diin gipahigayon ang entrapment operation sa dihang gi-claim na sa nagpaka aron ingnon nga customer ang laminated vaccination card.
Pahimangno sa kapulisan niadtong padayon nga naghimog peke nga vaccination card nga undangon.
Mag-atubang og kasong kalapasan sa falsification of public documents si Aricilla.
“Duna gyud siyay liability ilabi na karon ang atoang Covid-19 grabe kaayo, if i-fake man gud nato ang atong vaccination card maka koan ta nga fully vaccinated na sila kay dili man ka ka laminate kung dili ka fully vaccinated,” tipik sa pamahayag ni Police Lieutenant Codilla.
Aduna pay gi-monitor ang kapulisan sa Siyudad sa Sugbo nga laing mga tighimo og mga fake vaccination card.
DUGANG SILOT
Samtang ang konseho sa Dakbayan sa Sugbo adunay nag-ung ong nga ordinansa nga giduso ni Konsehal Renato Osmeña Jr. nga nagsilot niadtong mga masakpang nagpeke sa ilang vaccination card ug ubang pang dokumento labot sa Covid-19.
Ang “An Ordinance Penalizing Fraudulent Acts in Connection with Covid-19 Vaccination” naduso ni Osmeña niadtong Agusto 25 nga nagtangag og P5,000 nga multa ug duha ngadto sa unom ka oras nga community service depende sa hukom sa korte.
“Yes, atong paspasan pero moagi man gyud ni og proceso. Times like this, I already foresee that there are people who will take advantage of the situation. That’s why I introduced the proposed ordinance para ma-aware ang mga tawo nga ayaw pahimusli ang panahon sa pandemya ug ilaron ang mga tawo,” matod pa ni Osmeña.
Si Konsehal Raymond Garcia, majority floor leader ug chairman sa committee on laws sa City Council, niingon nga sa higayon nga moabot kini sa iyang opisina, himoan dayon kini niya og committee report aron nga makapahigayon og public hearing sa mosunod nga regular session aron mapaubos na kini sa third ug final reading.
Sa higayon nga ma-aprobahan sa konseho ug mapirmahan ni Mayor Edgardo Labella ang ordinansahon ni Osmeña, imantala kini sa mga pamantalaan nga adunay national circulation.
Mo-epekto ang maong balaodnon human sa 15 ka adlaw nga publication. / AYB, PAC