BASTA mosud na gani ang buwan sa tuig nga nagtapos og “bre” o “ber” sa Iningles, magsugod na sa pagpanimaho ang espiritu sa Pasko ug kaalegre sa palibot sa Pilipinas, nailang dunay labing taas nga kasaulogan sa Pasko nga magsugod karon, Septiyembre 1. Mga awit sa radyo ug dayandayan sa Pasko sa malls magsugod na.
Sadya kaha ang kasaulogan sa Pasko ning tuiga?
Sa miaging tuig, medyo nakibhangan ang mga kalihokan sa Pasko tungod sa pagtumaw sa coronavirus disease 2019 (Covid-19). Gidili ang panagtapok. Naisyu ang relihiyusong kalihokan nga gitumok nga usa sa hinungdan sa pagdaghan sa kaso sa Covid-19 niadtong panahona.
Sa pagkakaron, ang kaso sa Covid-19 sa Sugbo misaka og balik. Gipaubos og balik sa modified enhanced community quarantine (MECQ). Tungod sa lockdowns, daghang naapektohang negosyo. Dunay nanira. Uban nanaktak og trabahante. Ang resulta, daghang nawad-an og trabaho.
Hinuon, ang programa sa kagamhanan sa pagpabakuna nagpadayon sa paningkamot nga makab-ot ang herd immuntiy nga komunidad. Dugang dili maayong balita, sumala sa Department of Health (DOH), ang pagsulod sa nasod, labi na sa Sugbo, sa Delta ug Lambda variants sa Sars-CoV-2, ang virus nga hinungdan sa Covid-19.
Ug ikaduhang tuig na karon sa pakigbisog batok sa Covid-19. Hinaut nga nakakuha na kita og leksiyon sa kasinatian. Dili magpadaug sa virus nga magpadayong hulga sa taas pang katuigan. Gibanabana sa mga batid sa panglawas nga dili hingpit mapapas, apan mahimong kabahin sa atong kinabuhi sama sa ubang komon nga sakit.
Ang ato na lang, mosunod sa minimum health protocol ug modayon sa panginabuhi. Uban sa pag-ampo, magsadya gihapon ning nagsingabot nga Pasko ubos sa bag-ong normal.
Maayong Pasko sa tanan!