Diputado: Kanus-a gyud kaha mo-resign si Sec. Duque ?

UNSA kahay racket anang grupo sa mga batan-on nga magdaladala og bag unya mangayo og hinabang, apil pagkaon?

Pero kon imong mabantayan, nagsakay na sila og van unya i-drop sa usa ka lugar sa di pa mosugod sa ilang duol-duol sa mga tawo unya mangayo og hinabang.

Ang uban mag-Binisaya, ang uban sab mag-Tinagalog.

Kasagaran, duha o tulo na sila mag-uban sa usa ka grupo.

Nihit man rong panahona tungod ni Covid, ug daghan sa mga tawo naglisod og kwarta kay daghan ang nawad-an og trabaho, dili unta ta angay matingala kon daghan ang mangayo og pagkaon o kwarta.

Pero kon mogawas nga mora’g racket na ang gihimo tungod sa ilang modus, di ba angay nga matingala kita kon tinuod ba kaha ni o dunay sindikato nga nagpaluyo aning tanan?

Bibo ning nahitabo sa PDP-Laban karon.

Nagubot ang partido kay gitangtang ang grupo ni Senador Manny Pacquiao ug Koko Pimentel og gipulihan sa grupo ni Energy Secretary Al Cusi.

Wa pod magdugay, gitangtang pod sa grupo ni Pacquiao ang mga opisyal sa grupo ni Cusi. Bawos-bawos og tangtang sila. Di pa mahibaw-an og asa nga tangtang ang pinasubay sa balaod.

Unya, gidawat ni Presidente Rodrigo Duterte (PRRD) ang nomination sa PDP-Laban sa pagka-bise presidente pero gisalindot ni Senador Bong Go ang nomination sa pagka-presidente.

Makalibog ning pagdawat ni PRRD kay kadaghan na niya balikbalika og sulti nga inig kahuman sa termino sa 2022, mopahuway na siya sa Davao.

Ang nahitabo, nahimong duha ka grupo ang PDP-Laban, grupo ni Pacquiao ug grupo ni Cusi.

Unsa nga grupo man ang tinuod nga PDP-Laban? Bugtong ang Comelec o Supreme Court ra ang makatubag ana.

Sa pagka-karon, nabuak ang PDP-Laban. Kon buak ang usa ka partido, lig-on ba ang maong partido? Buyno, malipay ang ubang partido pod, labi na ang kontra.

Kanus-a kaha ni si Health Secretary Francisco Duque mo-resign noh?

Sa dihang gibatikos siya og maayo unya gisultian nga mo-resign na lang, misulti siya nga he serves at the pleasure of the president.

Karon nga misulti na man si PRRD nga dawaton niya kon mo-resign si Duque, mipalain na sab og tuno si Duque. Mo-resign kuno siya if the time comes.

Susmaryusep, kanus-a pa intawon. Siya ra diay ang magbuot kon kanus-a siya mo-resign bisan klaro na nga gibuhian na siya ni PRRD?

Nagtuo tingali si Duque nga kon mawala sa DOH, maparalisar ang tanang kalihokan sa departamento. Nagtuo tingali siya nga siya raang makahimo og kaayohan sa DOH.