TRAHEDYA ang gidangatan sa usa ka pamilya nga nagpuyo sa compound sa Arlington Pond, Barangay Santa Cruz, Dakbayan sa Sugbo human miigo ang sunog kagahapon, Agosto 31, 2021, sa 2:00 sa hapon.
Gibutyag ni FO3 Pulbert Navarro, imbestigador sa Cebu City Fire Department, nga sa inisyal nila nga imbestigasyon nga adunay lima ka lawas sa tawo ang ilang napalgan.
Wa magdugay adunay ika-unom nga paig nga lawas ang nakita.
Ang unang lima ka lawas nga napalgan giila nga ila ni: Hannah Mae Carvajal, 34, female; Felicity Sachi Carvajal, 12, female; Lyka Carvajal, 16, female; Andre Carvajal, 6, male; Dan Henry Carvajal, 3, male.
Saysay ni Navarro nga ang mga lawas nagtapad ra sa usa ka lugar.
Sa inisyal nga inpormasyon sa kabomberohan adunay duha ka tawo ang missing nga sila si: Lilian Carvajal, 72, female, ug Ivan Mejia, 58, male usa ka person with disabilities.
Atol niining pagsuwat wa pa matino kon si kinsa sa duha ka tawo nga gikatahong missing ang ika-unom nga lawas nga labing uwahi nga napalgan.
Pasado 8:00 kagabii gihunong na sa mga sakop sa Bureau of Fire Protection (BFP) Cebu City ang retrieval operation gumikan sa kangitngit na sa lugar.
NA-TRAP
Nagtuo ang imbestigador nga posible nga naglibog ang mga biktima kon unsaon nila paggawas sa balay gumikan sa bagang aso ug grabeng pag-ulbo sa kayo.
“Kining compound usa ray exit ug entrance mao to nangaratol nangatrap sila sa sulod,” matod ni Navarro.
Gipanag-iya ni Elizabeth Lao ang ancestral house diin daghan ang nagpuyo.
Gibana-bana sa kabomberohan nga moabot ngadto sa P11.2 milyones ang danyos sa sunog.
Wa pa sab matino kon unsay hinungdan sa pag-ulbo sa sunog.
Gawas lang sa saysay sa mga silingan nga nakadungog sila og buto sa balay ni Lilian Carvajal dayon miulbo ang kayo.
Wa pa usab masayri kon unsay nibuto.
Samtang si Sta. Cruz Barangay Kapitan Jerome Lim niasoy sa Superbalita Cebu nga ang PWD nga si Ivan Mejia naandan nga trangkahan sa iyang giabangan sa higayon nga ang igsuon adunay importante nga lakaw.
Apan inatiman kini sa iyang pagkaon ug pangihanglan sa iyang guardian.
Gihulagway nga dili makasulti ug dili makalakaw si Mejia.
USA RAY GAWSANAN
Gibutyag ni Lim nga wa nay agianan sa luyo nga bahin sa compound human nga adunay bikil ang mga tag-iya sa property.
Sa imbestigasyon sa kabomberohan ang hitabo nagsugod sa 1:57 sa hapon ug giisa ang sunog sa second alarm.
Under control ang kayo sa 2:25 p.m. ug hingpit nga napawong ang kayo sa 3:41 p.m.
Gawas sa mga casualty adunay mga nangaangol nga mga sakop sa BFP ug fire volunteer atol sa pakigkumbati sa kayo.
Ang mga angol mao sila si: Insp. Eraño Fernandez, 23, adunay paso sa kamot ug tiil; FO1 Terencio Lape, 30, nasamad sa kamot; fire volunteer John Robert Rallos, 22, samad sa pulso.
Moabot sa 15 ka balay ang nasunog, 10 niini ang naugdaw samtang lima ang nakan-an.
Adunay unom ka pamilya nga gilangkuban sa 30 ka indibiduwal ang apektado sa sunog.