ANG babaye nga nga real estate agent nga naglingkod sa luyo sa awto nga gisakyan ni manlalaban Rex Fernandez atol sa pagpusil patay kaniya gikonsiderar nga person of interest sa mga sakop sa Special Investigation Task Group (SITG) human nga wala mokooperar sa kapulisan sa ilang imbestigasyon.
Adunay nakakita ug naka video nga saksi nga human sa insidente, nigawas sa awto si Rosinda Acot.
Nakita sa video nga gidala ni Acot ang mga personal nga butang ni Fernandez nga wala magpaabot sa mga pulis nga mosusi sa sakyanan aron unta makakuha og lead sa imbestigasyon ang kapulisan.
Matod ni Col. Josefino Ligan, hepe sa Cebu City Police Office (CCPO), nga sa mga ebidensya nga nakuha sa sulod sa sakyanan ni, ang cellular phone ilang gipangita nga gituohan nga nadala ni Acot.
Tungod niini, nanawagan sila karon ni Acot nga mopatim-aw sa CCPO aron makuhaan siya sa iyang habig ug unsa usab ang mga butang nga iyang gipangdala.
“Sa pagkakaron, ato siyang makonsidera nga person of interest especially nga naa siyay gipang kuha nga vital nga mga items, possibly usa ato ang cellphone nga dapat unta nato ma subject or ma-exploit. Maong kinahanglan siya nga mopatim-aw para ma interview,” matod ni Ligan.
Wala pa usab silay matumbok kon unsay anggulo ug motibo sa pagbanhig patay kang Fernandez niadtong miaging semana sa Duterte Street, Sitio Banawa, Barangay, Guadalupe, Siyudad sa Sugbo.
Matod ni Ligan nga sa pagkakaron nagpadayon pa sila sa pagkuha og mga ebidensya ug pag-ila sa mga killer.
Aduna na silay nakuha nga kopya sa CCTV footage diin makita ang pag ikyas sa nag atang nga motorsiklo nga getaway vehicle.