MAAYONG adlaw, mga Super Suki. Septiyembre na gyud! Duol na ta sa tumoy sa 2021.
Sunod bulan, Oktubre 1-8, mao na ang pag-file sa Certificate of Candidacy (COC) sa mga buot magpapili sa 2022 national elections apil na ang pagka-presidente sa nasud.
Atong namatikdan nga apil ang panerbisyo sa mga senador nabahiran na og pamolitika ug makita na ang tinuod nga kolor kon unsa sila.
Ang mga kanhi sipsip kang Presidente Rodrigo Duterte, karon nahimo na nga mga tigpaghot sa administrasyon kay kuno daghan ang anomalya sa pagdumala ni President Digong.
Kon imong sutaon kinsa sila, imong matuki nga mga nangandoy sila nga maoy mahimong sunod nga presidente sa nasud inig kahuman sa termino ni President Digong.
Kinsa sila? Mga buot magpapili pagka-presidente sa nasud sila ni Senador Panfilo "Ping" Lacson, Richard Gordon ug Emmanuel "Manny" Pacquiao.
Apil sa mga isyu nga ginatabangan pagtuki karon sa mga senador ang kurapsiyon kuno diha sa buhatan sa Department of Health (DOH) kay buot ipagawas sa mga senador nga dunay kurapsiyon sa pagpamalit og mga gamit sama sa mga personal protective equipments (PPEs) ug uban pa nga gigamit tungod sa pandemic.
Sa pagdumala ni kanhi President Benigno Noynoy Aquino, dunay gipamalit nga PPEs sa kantidad nga P3,500 apan walay nigawas nga isyu sa kurapsiyon.
Sa panahon sa pandemya sa Covid-19, nakapalit ang administrasyon ni Duterte og PPEs sa kantidad nga P1,700. Over priced kuno, matud sa mga senador.
Apil sa pangutana sa mga senador kang Budget Undesecretary Lloyd Christopher Lao sa Department of Budget and Management (DBM), kinsa ang nagpasulod kaniya sa iyang gihuptan nga posisyon?
Buot ipagawas sa mga senador nga si President Digong ang utok sa pagbutang kaniya sa DBM nga ilang giakusahan sa kurapsiyon.
Kon akoy presidente, normal lang nga akong seguruhon nga akong masaligan ang mga naa sa akong mga gabinete.
Masabot nga dunay pag-uyon ang Presidente pagdawat kang Lao.
Kon Dabawenyo man siya o taga asang dapit nagapuyo, desisyon na sa pangulo ang pagpili kon kinsa ang naa sa iyang palibot aron pagseguro nga tunhay ang dagan sa iyang pamunoan.
Tataw ang sulti ni President Digong nga kon duna silay kurapsiyon nga nahimo, pasakaan og sumbong ug ipakulong dili lang puro pa-pogi nga kunohay nag-imbestiga apan walay sangputanan. Dili pulos pamolitika kay hapit na ang eleksiyon.
Sa laing bahin, gipalagpot na kuno sa PDP Pacquiao group si President Duterte isip chairman sa partido ug giilisan ni Senador Koko Pimentel.
Nagkainit ang panagbangi ug nasiak sa duha ka paksiyon ang partido tungod kay buot ni Manny Pacquiao nga siya ang ituboy pagka-presidente alang sa umaabot nga eleksiyon.
Kon atong himayhimayon, dili si Pacquiao o si Pimentel ang nakapadaug kang Digong nga nahimong presidente sa nasud.
Mas madawat pa sa katawhan nga si Digong nakatabang sa ilang kadaugan pagka-senador kay kon atong sublion ang kahimtang ni Koko Pimentel, naglisud man gani siya pagdaug sa iyang panahon.
Wala siyay posisyon nga gikuptan sa PDP kon wala nasiak sa duha ka grupo diin iyang gitawag nga "Hijacker" ang paksiyon karon ni Alfonso Cusi diin si President Duterte ang nagpabilin nga chairman.
Kampante nga nagpahipi sa Hugpong ng Pagbabago si Mayor Sara Duterte kay dili siya buot mahimong standard bearer sa gubot nga partido sa PDP sa umaabot nga eleksiyon.
Pahimangno lang ni Mayor Sara sa mga construction firms, ayaw mo pailad kay wala siyay gitahasan nga mga tawo pag-solicit og campaign funds para sa iyang kandidatura.
May adlaw rang madakpan mo, makatilaw sab mo sa kumo sa mayor.
Sa natad sa politika, walay bili ang pulong nga "forever" kay nagapabilin pa ang panultihon nga sa politika walay hangtud nga higala.
Kadaghanan kanila, personal nga interes lang, pwera de los buenos.