SA tinguha nga makulit og balik ang iyang pangalan sa kalibutan sa boxing, ang kanhi Sugboanong world champion nga si Jhack “El Kapitan” Tepora mobalik og saka sa ring sa Disyembre 2021.
Kini maoy gibutyag sa iyang maguwang nga mao usab ang iyang trainer nga si Christopher “Pingping” Tepora.
Matod ni Pingping nga laraw unta nila nga karong Oktubre, 2021 paawayon ang 26-anyos niyang manghod apan gumikan kay gipaubos man sa Modified Enhance Community Quarantine (MECQ) ang Sugbo tungod sa pagsaka sa pagkatap sa coronavirus, hayan nauswag kini sa Disyembre.
Hinuon wala pa matino kon kinsa ang makontra sa gitawag og El Kapitan ug ingon man asa usab kini ipahigayon.
Ang maong away magsilbing tuneup fight ni Tepora sa dili pa kini moaway sa gawas sa nasod.
“Tune up fight ni niya kay duha na ka mga tuig kapin nga wa siya nakaaway,” matod ni Pingping.
Sa sayo pa, sa Radio One Cebu interview, si Jhack Tepora mibutyag nga aduna na siya’y komunikasyon sa iyang promoter sa Estados Unidos diin siya gipasaligan nga paawayon og balik kon mahiuli na ang kondisyon niini.
Katapusang nakaaway si Tepora niadtong Disyembre 21, 2019 diin nasugamak siya sa iyang unang kapildihan sa dihang gi-knockout siya sa beteranong si Oscar Escandon sa first round sa Amerika.
Giangkon ni Tepora nga sa pagkakaron mosobra sa 150 lbs. ang iyang timbang nga layo ra kaayo sa iyang fighting weight nga 126 lbs.
Apan iyang gipasabot nga dali ra kaayo kini niyang makuha ilabi na og magsagunson na siya og away. Hinuon sa tuneup fight, posibling sa 135-140 lbs. ang iyang awayan.
“Mangita pa mi og kinsay available niyang makontra. Magdepende ni sa iyang maatbang kon unsa nga timbang,” matod ni Pingping, ang kanhi trainer ni World Boxing Organization (WBO) bantamweight champion Johnriel Casimero.
Sa niaging semana, si Tepora sa iyang Youtube channel maisugon nga mihagit ni Mark Magsayo, kinsa lab-as pa sa impresibong kadaugan batok ni Julio Ceja sa undercard sa Pacquiao-Ugas fight card niadtong Agusto 21, 2021 sa Las Vegas, Nevada.