ARON iyang maatiman ang iyang tulo ka mga anak, gibiyaan ni Hannah Mae Carvajal ang iyang trabaho sa usa ka 5-star hotel sa Dakbayan sa Lapu-Lapu.
Sila si Hannah Mae ug iyang tulo ka mga anak apil sa pito nga nangamatay sa sunog sa Martes sa hapon, Agosto 31, 2021, sa Arlington Pond, Barangay Santa Cruz, Dakbayan sa Sugbo.
Samtang ang ikapito nga missing nga lawas nakaplagan sa Miyerkules sa buntag, Septiyembre 1.
Matod sa suod nga higala ni Hannah Mae, buotan nga pagka inahan ug pagka asawa ang iyang higala ug mapinanggaon sa iyang mga anak ug sa tanang mga sakop sa pamilya.
“Good mother, buotan jud na siya, Sir. Dayon buotan sad ang pamilya ni Hanhah. Nag-work na siya Shangrila, pero pag naa na siya mga anak, focused siya sa pag-atiman ila mga anak,” matod sa suod nga higalang babaye ni Hannah Mae nga nihangyong di lang siya nganlan.
Ang bana ni Hannah Mae, kinsang ngan gipugngan sa Superbalita Cebu, sa abroad nagtrabaho, apan wa masayod ang higala kon unsa nga nasod ug unsa ang trabaho.
Matod sa higala nga grabe usab makatabang si Hannah Mae sa iyang mga higala kay kahibawo kini mounong.
Samtang nag-chat sa Messenger ang Superbalita Cebu, matod sa higala nga di matukib ang iyang kasakit nga gibati.
Naglisod siya sa pagdawat sa nahitabo sa iyang suod nga higala ug tulo ka mga anak kay nagbangutan pa siya sa kamatayon sa iyang inahan.
Wa pa siya makalimot nga nitabang si Hannah Mae kaniya sa dihang nawad-a siya og panimuot.
“Dayon siya maoy naa sa akong tapad nag monitor sa akong BP. Wa siya mibiya nako kon wala ko na okay, maong di jud kalimot niya,” matod sa higala.
Ang balay ug luna gipanag-iya sa pamilya sa bana ni Hannah Mae.
NAKIT-AN
Ang gihulagway sa Cebu City Fire Office nga labing masulub-on nga trahedya sa sunog karong tuiga, pito ang kompirmado nga nakalas sa nahitabong sunog sa Arlington Pond, Barangay Sta. Cruz, Dakbayan sa Sugbo niadtong Agosto 31.
Human makit-i ang usa sa nahabiling lawas sa Miyerkules sa buntag, gikompirmar sa kabomberohan nga nakalas sila si Hannah Mae Carvajal, 34; Felicity Sachi Carvajal, 12; Jen Lyka Lino, 16; Andre Carvajal, 6; Dan Henry Carvajal, 3; Lilian Carvajal, 72; ug Ivan Mejia, 58.
Matod sa tigpamaba sa CCFO, SFO1 Wendel Villanueva nga giingong natanggong ug wala makagawas sa ilang gipuy-an ang pito ka mga biktima hinungdan nga naapil og kasunog.
Usa sa gitan-aw nila nga rason nga wala dayon kini makagawas tungod kay posible nga natuok na sa aso ang mga biktima.
“Base sa account sa naka survive, paggawas niya, murag late na bitaw siya naka realize nga duna siya’y mga kauban sa sulod. Wala naman siya gitugtan nga makabalik sa balay nga nasunog,” si Villanueva nagkanayon.
ALARM SYSTEM
Gihatagan usab og importansya ni Villanueva ang pagmontar og alarm system sa panimalay nga dako og tabang aron makahibawo ang mga miyembro sa pamilya nga aduna’y sunog nga nahitabo.
“Ang numero uno makapaluya, makapatay nato.It’s because of the smoke due to suffocation,” matod ni Villanueva.
Matod niya nga importante usab kining simulation exercises o pag-practice sa panimalay sa Exit Drill in the Home (Edith) aron malikayan nga aduna’y makalas sa mga insidente sa sunog.
“Your fire fighters in Cebu City Fire Office and all over the Philippines among gi-encourage ang tanan to do pratice Edith. Exit drill in the home. We need to practice that kay not all the time especially mga ginikanan, ato gyud (i-practice) atong mga anak, sakop sa pamilya nga mag exit drill ta kay og simbako dunay sunog, ato na ma identify asa ta mogawas.”
Dugang ni Villanueva nga kinahanglan usab nga aduna’y common area aron didto mag-abot kon aduna’y sunog.
Sa labing uwahi nga report sa CCFO, 15 ka panimalay ang naugdaw samtang lima ang nakan-an sa kayo.
Niabot usab sa P11.2 milyones ang danyos sa sunog.
Wala pa hinuon matino sa kabomberohan ang hinungdan sa maong sunog apan nasuta nga nagsugod kini sa second floor sa panimalay sa usa ka Lizabeth Lao.
Alas 2:03 sa hapon niadtong Martes dihang nadawat sa kabomberohan ang alarma sa sunog ug sulod sa 22 minutos nakontrolar nila kini.
Alas 3:41 sa hapon na dihang hingpit na nga na-fire out ang sunog.
Nasayran nga sa mga bombero nga miresponde tulo ang samdan.
Naglakip kini nila ni Insp. Eraño Fernandez, 23, nga nakaangkon og paso sa iyang wala nga tiil; FO1 Terencio Lape, 30, nga samdan sa wala nga pad niini; ug Fire Volunteer (Sambag 2 Fire)John Robert Rallos, 22, nga samdan sa iyang wala nga pulsohan.(Dugang taho ni REV)