GISUGYOT ni Cebu City Councilor Philip Zafra nga dili pasikiton ang manag-uyab sulod sa sakyanan aron dili lagi magtakod sa virus. Namatikdan siguro ni Zafra nga bisan kon anaa sulod sa public transportation, magpakita sa ilang public display of affection (PDA) ang manag-uyab. Kon puwede pa, magsinabakay man gani. Kabalo naman mo og manag-uyab mga “loving” man kaayo.
Pareho gihapon ni niadtong ubang kamanduan sa kapulisan nga dili magpakita sa ilang PDA ang mga manag-uyab diha sa mga plaza o mga lugar nga anha mag-date, bisan gani og mag-holding hands lang. Mo-observe gihapon sila og social distancing. Puwede ba na? Basta uyab pa “sweet” ra ba kaayo. Morag tikoy nga pirming sikit o pilit. Pero kon magminyo na, aw, lagyo na uy.
Sa makadaghang higayon gipasabot kita kon unsa kamahinungdanon ang pagdistansiya sa ubang mga tawo aron kaminusan ang pagkuyanap sa kagaw sa Covid-19. Labaw nang gidili ang hinikapay. Tingali dinhi ning bahina daghang Pinoy mosuki nga dili ka na paduolon. Dili pa gyud ka pahikapon ug labaw sa tanan dili pa gani ka makasikit sa imong mga minahal.
Kanunay gibalik-balik sa atong propaganda sa radio ang paglikay sa beso-beso, halok, gunit-gunit o bisan man gani ang paglamano sa pagka-karon. Aduna man gani plano ang mga magbabalaod nga usbon ang pagpakita og respeto, dili na pinaagi sa pag-amin o lamano, kon dili moyuko na lang ang tawo. Unya na kon makasagubang o makalabay na ta aning maong pandemiya nga gawasnon na tang tanan nga makahimo labaw sa pagsikit-sikit sa atong mga minahal.
Okey na unya na bisan pa sa mga SSDU o sikit-sikit bisan dili uyab. Kining maong plano ni Konsihal Zafra walay kalainan niadtong unang kamanduan nga dili maka-backride ang mga asawa sa motorsiklo sa ilang mga bana. Dili maka-backride apan inig abot sa balay, magdulog ra gihapon. Dili pasikiton ang manag-uyab sa mga sakyanan labi pa sa jeep, apan mag kiss-kiss o beso-beso ra gihapon kon walay tawo nga magtan-aw.(bobbygnalzaro@gmail.com)