SIKAT nga boksidor sa Sugbo ang mag-atubang og malisod nga tahas dili ibabaw sa ring kon dili sa korte sa hustisya.
Kini human nga usa ka 14-anyos nga babaye ang mireklamo nga gimolestiya sa inilang boksidor nianang alas 4:00 sa hapon sa Septiyembre 1, 2021, adlawng Miyerkules.
Basi sa natala sa blotter sa Pardo Police Station, ang gireklamo giila nga si Albert Gerogalim Pagara, 27, nga adunay address nga Poblacion, Maasin, Leyte ug usa ka professional boxer.
Si Pagara nanimuyo sa Sitio Terra Dulce, Barangay Inayawan, Dakbayan sa Sugbo uban sa iyang live-in partner diin nahitabo ang pagmolestiya.
Sa iyang reklamo, gisaysay sa katorse anyos nga samtang siya natulog, mao na la’y iyang namat-an ang gibuhat ni Pagara ngadto kaniya samtang siya nahinanok.
Ang dalagita gikuyogan sa iyang inahan sa pagpa-blotter sa maong hitabo.
Si Pagara gisikop pinaagi sa citizens arrest nianang alas 7:30 sa gabii nga gi-abagan usab sa mga barangay tanod sa Inayawan nga sila si Danilo Girao, Danilo Abangan, Nelson Tero ug Pablito Balinguit Jr.
Kasong pagpanglugos ang posibling atubangon sa suspetsado.
Si Pagara adunay rekord nga 33-1, 22 knockouts isip professional boxer.
Katapusan siyang nakaaway niadtong Disyembre 18, 2020 diin iyang gipildi si Virgil Puton pinaagi sa unanimous decision sa IPI Compound sa Mandaue City.
Ang kanhi pambato sa nasira nga ALA Boxing Gym ubos na karon sa pagdumala sa usa ka dakong international boxing outfit nga mao ang MTK Global and D4G Promotions.