MITAKDO na sa lima ka tuig ang mangilngig nga September 2, 2016 Roxas Night Market bombing sa Davao City, apan lab-as gihapon sa panumdoman sa mga masahista ang hitabo nga gikamatay sa sagad nilang mga kaubanan.
Sa talaan sa mga casualties, mikalas ang maong hitabo og 15 ka kinabuhi ug miangol og 69 ka mga tawo.
Adlawang Huwebes, subling nanumbalik ang mga kagahapon sa kalisang, kayagaw ug agulo sa kasakit sa mga nasamdan ug kabanay nga napagan ang ilang miyembro sa pamilya.
Ang kanhi hugyaw ug puno sa kasadya nga Roxas Night Market sa kalit nahulipan sa kaguol ug kahadlok tungod sa hitabo.
Apan sa paningkamot sa lokal nga gobyerno, katawhan ug awtoridad, 2020 nasilutan ang 11 ka indibiduwal nga nagpaluyo sa pagpamomba.
Sa 32-pahina nga desisyon ni Judge Marivic Vitor sa Taguig Regional Trial Court, Branch 266, nakita nga ang mga miyembro sa Maute group "guilty beyond reasonable doubt for the complex crime of multiple murder and multiple attempted murder."
Ang desisyon mihatag og paglaum sa mga nabiktima sa trahedya.
Ang trahedya nga mipukaw sa matag usa nga pabiling igmat, abtik ug mabinantayon sa hadla sa terorismo. (Jeepy P. Compio)