NABANTAYAN nga nikanaug na ang mga kaso sa coronavirus diseases 2019 (Covid-19) sa nakalabay nga mga adlaw human sa grabeng pagsulbong niini sugod sa Hulyo. Hayan usa sa mga hinungdan niini mao ang pagpahugot sa pagpatuman sa mga health protocol.
Ang pagpanakod naa sagad sa mga panagtapok, labina sa mga dapit nga sirado. Pun-an pa sa pagsulod sa mas mananakod nga Delta variant.
Sa mga siyudad sa Sugbo, Mandaue ug Lapu-Lapu, gipatuman ang liquor ban, dine in sa mga kan-anan ug gipahugtan ang pagpatuman sa mas sayo nga curfew. Bisan gani ang pultahan sa mga public transport gipaablihan aron mas minos ang kahigayunan sa pagpanakod.
Namatud-an na man nga ang pagpahugot sa pagpatuman sa health protocol sa nangaging duha ka wave sa Covid-19, epektibo. Kada hugot sa pagpatuman sa mga health protocol ug uban pang mga restriction aron malikayan ang mga tapok, mominos ang pagpanakod. Nagpasabot nga paglikay sa tapok, social distancing ug pagpuyo sa balay epektibo kaayo.
Sa ato pa, kon mosunod lang ang publiko sa gipangdili sa kagamhanan samtang naa pa ang pandemic, di makabuylo ang kagaw sa Covid-19 sa pagpanakod sa tawo. Apan ang nakapait lang, gikinahanglan pa sa mga awtoridad nga manakop aron mapatuman ang kamandoan sa kagamhanan.
Bisan sa mga barangay, ang mga opisyal haguka kaayo sa pagpatuman sa mga lagda kay basin nahadlok sa pulitikanhong pagsumbalik sa mga lumolupyo nga maigo sa hugtanay nga pagpatuman. Sa laktod, kuwang sa politicial will.
Isip responsable nga mga lumolupyo sa Sugbo, wa na unta kinahanglana pa nga magbantay ang kagamhanan aron motuman ang tanan sa mga lagda. Di ba daghan kaayo ang manaway sa kagamhanan tungod sa mga palpak? Apan unsa may katungod nimo kon ikaw di usab motuman sa yano kaayong mga lagda batok sa Covid-19? Wa kay angay kay salawayon ka sab.