PASTILAN no, wala kita magtuo nga kining atong honorableng tag-as nga mga opisyal sa gobiyerno mora man sab og mga lab-asera kon mag-tinubagay sa publiko. Mawala man ang ilang pagka-honorable kay mogawas na man nga persolan na ang sinukliay sa mahait nga mga pulong. Morag sab og ordinaryo nga mga tawo nga madala sa ilang garbo ug emosyon. Morag dili mga edukado.
Sama aning tinubagay karon tali nila ni Presidente Rodrigo Duterte ug ingon man sa pipila ka mga senador kabahin sa mga kuwestiyonable nga pagpalit og mga mask, personal protective equipment (PPE) ug ubang mga kagamitan sa Covid-19 response sa Department of Health (DOH).
Niadto pa ning miaging tuig ang pagpamalit sa maong mga kagamitan nga gidudahan nga adunay mga anomaliya. Ang nakakuha sa kontrata usa ka gamay lamang nga kompaniya ug walay igong kapital, apan dako kaayo ang nakuha nga pahat sa pagpalit sa mga kagamitan. Unya ang mga suod ni Presidente Duterte ang gidudahan nga maoy nagpaluyo ning maong mga kontrata. Naapil man gani si Senador Bong Go kay mga suod pod sa senador ang mga nahilambigit.
Mao kini ang gustong imbestigahan sa Senate Blue Ribbon Committee nga gipangulohan ni Senador Richard Gordon. Apan nangugat si Pres. Duterte sa pagdepensa sa mga tawo nga nagpaluyo ning maong multi-billion transaction. Wala kunoy anomaliya. Nahitabo ang tinubagay sa mga senador ug Presidente.
Unang namersonal si Duterte pinaagi sa pagtawag ni Gordon og tambok ug tabian. Kay si Gordon lang ang kanunay motabi kon adunay mga committee hearings. Iya usab gisaway ang “hairdo” o hinapay ni Senador Ping Lacson. Pastilan no, nahimo nang personalan ang usa ka lihitimo nga isyo nga angay untang hatagan og katin-awan sa mga nahilambigit niini alang sa kasayuran sa katawhan.(bobbygnalzaro@gmail.com)