NIADTONG Disiyembre 2020 misugod ang Inter-Agency Task Force for the Management of Emerging Infectious Diseases (IATF-EID) pagsugo sa mga tawo nga magsul-ob og face shield, gawas sa mask kon ugaling mogawas sila sa balay. Hugot kining gipatuman labi na sa mga malls. Apan atong na-obserbahan nga mosul-ob lang sila sa face shield kon dunay mananakop. Karong bag-o, wa na estriktuha ang pagamit niini kay wa man kita makabalita nga adunay nadakpan nga wala magsul-ob og face shield. Sumala sa Department of Health (DOH) nga ang face shield makapugong sa pagtakud sa Covid-19 agi sa mata. Kon mao, nganong dili man mahimo nga magsul-ob lang kita og visor o kaha shades kun antipara?
Ang World Health Organization (WHO) buot masayod kon anaa bay nahimo ang face shield batok sa Covid-19 kay ang mga Pilipino ra man ang gipugos sa pagsul-ob niini sa tibuok kalibutan, apan grabe man gihapon ang kaso sa Covid-19 sa Pilipinas itandi sa mga nasud nga wa magamit og face shield.
Ang pagduda sa katawhan nga gigamit kini og negusyo inay batok sa pandemic. Napalig-on karong bag-o sa dihang nabulgar na sa Senado nga adunay kadudahan kaayong pagpamalit niining face masks, face shield ug ubang medical supplies nga balor og P8.68 billion sa Pharmally, usa ka tindahan nga na-rehistro niadto lang Septiyembre 4, 2019 sa paid-up capital nga P625,000. Si Michael Yang nga gitudlo ni Pres. Rodrigo Duterte isip presidential economic adviser, mipresentar ngadto kang Duterte sa dagkong opisyal sa Pharmally International of Taiwan sa Malacanang. Pagka- Abril 14 ngadto sa Hunyo 10, 2020 si kanhi undersecretary Lloyd C. Lao sa Department of Budget and Management-Procurement Service (DBM-PS) mipalit gikan sa Pharmally Pharmaceutical Corp. sa mga medical supplies nga wala lang niya sutaa pag-ayo ang maong kompaniya. Gipasanginlan usab sa mga senador nga overpriced ang mga face masks ug face shields.
Agig tubag ni Presidente Duterte sa pasangil nga adunay anomaliya ang maong pagpalit, iyang gisaway personal ang mga senador nga may pagduda sa maong transaksiyon, si Dick Gordon, Ping Lacson ug Imee Marcos. Apan ang iyang gipasangil nga si Imee Marcos miadto sa Davao City kay buot siyang modagan og bise kang Mayor Sara Duterte Carpio gipanghimakak ni Inday Sara mismo. Ang kuyaw niini kay basin og dunay mahitabong krisis tali sa Senado ug Malacanang kay misaad raba ang Presidente nga dili na niya tugotang motambong ang mga sakop sa iyang Gabinete ug ang mga opisyal sa military sa Senate inquiry. Siya lang kunoy bahala kon ugaling i-contempt sila sa Senado. Kining nahitabo sa Senado mas mapun-an pa inig yagyag na ni Sen.Manny Pacquiao sa dugang anomaliya human unya sa iyang 10-day quarantine. (mannyrabacal1144@gmail.com)