SAMTANG naa sulod sa selda sa Pardo Police Station sa Cebu City Police (CCPO), si Cebu star boxer Albert Pagara misuway paghikog sa Huwebes sa hapon, Septiyembre 2, 2021.
Apan nakit-an siya sa iyang kaubang mga piniriso hinungdan nga naluwas.
Si Pagara, 27, taga sityo Terra, Barangay Inayawan, Dakbayan sa Sugbo, gipadakop sa inahan sa 14 anyos nga dalagita sa Miyerkules, Septiyembre 1, human gireklamo nga milugos kaniya samtang natulog sulod sa ilang balay sa Inayawan.
Apan si Pagara hugot sa iyang pagpanghimakak nga iyang nahimo ang krimen.
Matod sa kaubang mga piniriso ni Pagara, ilang nakit-an nga naghigot na og liston sa sapatos sa iyang liog ang boksidor nga gibaligtos ngadto sa rehas sa selda.
Naglingkod si Pagara nga natuok na sa liston sa sapatos.
Dali nila kining gitabang ug nasanta hinungdan nga wa maunsa si Pagara sa iyang gibuhat.
Naabtan sa Superbalita Cebu si Pagara nga nagpahuway na sulod sa selda human sa hitabo.
Sa interbyu sa Superbalita Cebu, niangkon si Pagara nga nauwaw kaayo siya sa pasangil batok kaniya. Subli niyang gihimakak nga iyang gilugos ang dalagita nga paryente sa iyang kapuyo.
INSIDENTE
Matod ni Police Lieutenant Colonel Wilbert Parilla, deputy city director for operations sa Cebu City Police Office, samtang natulog ang dalagita, giingong kalit lang kini nga gihinol sa boksidor ang mga pribadong bahin sa lawas.
Giingong wala lang mag langas sa biktima tungod sa kahadlok, apan paglabay sa pipila ka oras, nitug-an kini sa iyang inahan nga mao na usab ang mi report sa mga barangay tanod nga maoy nidakop sa boksidor.
“At first natulog ni ang biktima and then nga mao nalay iyang nabantayan nga gihikap ang iyang pribadong lawas. Wala lang siya mopalag. According sa biktima nga wala siya mo react kay nahadlok siya sa suspect,” matod ni Parilla.
Gidala si Pagara sa Pardo police station alas 7:30 sa gabii sa Miyerkules aron imbestigahon ug hugot kini nga mihimakak sa pasangil batok kaniya.
Apan adunay mga ebidensya nga gipakita ang kabanay sa biktima sama sa resulta sa medical exam niini sa pink room sa Vicente Sotto Memorial Medical Center nga gihilabtan siya ni Pagara.
“Mi-deny man gyud ni siya sa allegation. Later on sa interview sa atoang WCPD sa Station 7, iyaha ra daw gihikap but that on his part sa iyang alibi. But we will stick on the allegation of the victim who is a minor,” dugang ni Parilla.
Ang hepe sa Pardo police station police Major Jose Angelo Acupinpin mitug-an nga positibo nga gitumbok sa dalagita ang boksidor nga maoy niamong-among kaniya nga tungod niini, giandam na nila ang kasong pagpanglugos in relation sa kasong child abuse.
Gitakda usab nga ipaubos sa stress debriefing ang dalagita sa mga sakop sa Department of Social Welfare and Development (DSWD 7) tungod kay na trauma pa sa hitabo.