Mayor nilaum kagubot mahusay

Hulagway gikan sa MSWDO-Pikit
Hulagway gikan sa MSWDO-Pikit

KIDAPAWAN CITY -- Dako ang pagtuo ni Mayor Sumulong Sultan sa Pikit, North Cotabato nga matagaan gihapon og solusyon ug matakdo og balik ang relasyon sa duha ka mga armadong pamilya sa usa ka Moro front human nga subling nagka-engkuwentro niadtong Huwebes sa hapon.

Mihikling ang mokabat ngadto sa 336 ka mga indibiduwal sa duha ka mga barangay sa Pikit human miulbo ang giyera tali sa duha ka pamilya.

Sa taho gikan sa North Cotabato Provincial Police Office, nasayran nga subling nagkapinusilay ang duha ka armadong pamilya sa mga barangay sa Dalingaoen ug Balatikan sa nahisgutang lungsod.

Tungod sa kahadlok, ang mga sibilyan namakwit paingon sa mga luwas nga dapit sa kabalaka nga maipit sa kagubot.

Kahinumdoman nga una nang nagkabinakbakay ang nahisgutang mga pamilya niadtong Agosto 25, 2021.

Apan subli kining miulbo human masugnoran sa dihang usa sa mga pamilya napatyan.

Tulo na ang gikatahong napatay ning kasamtangan samtang lima ang samaron sa katag-katag nga pinusilay sa magkasikbit nga mga barangay.

Nagpatukod na ang lokal nga panggamhanan sa Pikit ug Bangsamoro Autonomous Region in Muslim Mindanao og dugang tulda nga kapuy-an sa mga bakwit.

Una na nga nagpaabot og tabang ang LGU sa Pikit nga gipangulohan ni Mayor Sultan sa mga pamilya nga sentrong naapektuhan sa kagubot. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph