STA. CRUZ, Davao del Sur -- Malampusong nauli sa tag-iya sa pitaka human kini nakit-an sa matinud-anong pulis nga sakop sa Revitalized Pulis Sa Barangay (R-PSB), Septyembre 2, 2021.
Sa report sa Sta. Cruz Municipal Police Station, giingong gikan namalengke ang mga pulis sa panguna ni Police Lieutenant Joseph Orbell Pojas ubos sa superbisyon ni Police Major Lief Quililan, 1st DSPMFC Force commander.
Alas 7 sa buntag sa Septyembre 2 gikan ang nasampit nga mga pulis sa pelengke diin sa pagbalik ilang nakit-an ang pitaka sa usa ka Marlon B. Felipe nga taga Sto. tomas, Davao del Norte.
Daling gitawgan ang numero sa ID, hinungdan nga nauli kini nga dunay cash nga P2,720 ug nagkadaiyang mga IDs.
Sumala sa tag-iya nga padung siya sa Makilala kinsa nangihi lamang sa may Tuban ug wala na niya namatnguni nga wala na iyang pitaka.
Dako ang pasalamat sa tag-iya sa pitaka sa kamatinud-anon sa R-PSB sa Sta. Cruz police ug iya kining gidayeg. (Jeepy P. Compio)