SUSIHON sa pamilya ni Malo Galinato Pailden kon duna ba silay napirmahang waiver alang sa ikaduhang operasyon sa ginang sa Vicente Sotto Memorial Medical Center (VSMMC) kay wa sila mosugot nga ipailawom kini sa ikaduhang operasyon.
Si Lemuel Galinato, manghod nga lalake ni Malo, niingon nga sumala sa ilang nahinumdoman, wa sila motugot sa ikaduhang operasyon nga gipahigayon sa Huwebes sa hapon, Septiyembre 2.
Ang operahan mao ang buko-buko sa iyang maguwang nga dunay grabeng mga paso.
Matod ni Lemuel nga nabalaka sila kay niadto pa lang Miyerkules naoperahan usab kini sa iyang mga paso sa kamot ug tiil.
Ang banay nga Galinato nakugang na lang nga gipahibawo sa ilang iyaan nga si Melody Torrejos, kinsa nagbantay kang Malo, nga namatay ang iyang maguwang nianang kaadlawon sa Biyernes, asoy ni Lemuel.
Sa gipakitang death certificate sa pamilya sa Superbalita Cebu, ang namatyan ni Malo mao ang “acute coronary syndrome, myocardial infarction” kun atake sa kasingkasing.
Nakabutang usab sa death certificate nga siya “Covid-19 positive” sumala sa laboratoryo.
Matod ni Lemuel nga gisakitan kaayo sila sa nahitabo ni Malo busa ilang susihon aron kon duna may manubag sa kamatayon, ila kining ireklamo.
Matod niya nga maayo pa kaayo ang iyang maguwang nga gikaestorya busa nakugang sila sa kalit nga kamatayon sud sa tambalanan.
Si Malo daling gilubong sa Biyernes sa hapon sa usa ka pribadong sam-ang nga giputos og maayo ang lawas ug wa ablihi ang lungon.
Si Malo napaso sa pagluwas sa iyang mga anak sa sunog niadtong Agusto 23, 2021 sa Little Village, Barangay Basak, Dakbayan sa Lapu-Lapu.(REV)