Ang kanhi boxing world champion ug inila nga si Oscar De La Hoya nahidangat sa hospital human kini nagpositibo sa Covid-19.

Kini maoy hinungdan kon nganong nakanselar ang iyang pagsaka og balik sa ring batok ni Vitor Belfort nga gikatakda unta sa sunod semana.

Ang 48-anyos nga De La Hoya, sa iyang video nga gi post pinaagi sa Twitter nga anaa karon siya hospital aron magpaalim. Kini bisan pa man og fully vaccinated na siya.

“Wanted you to hear directly from me that despite being fully vaccinated, I have contracted Covid and am not going to be able to fight next weekend,” matod ni De La Hoya.

“Preparing for this comeback has been everything to me over the last months, & I want to thank everyone for their tremendous support.”

Nanghinaot si De La Hoya nga mauswag ngadto sa uwahing bahin ning tuiga ang iyang away.

Katapusang nakaaway si De La Hoya niadtong 2008 diin siya gipaundang ni Manny Pacquiao sulod sa walo ka round sa Las Vegas.

Apan niadtong Hunyo ning tuiga, iyang gipahibawo nga mobalik siya og saka sa ring batok sa Brazilian mixed martial arts fighter nga si Belfort nga adto ipahigayon sa Staples Center sa Los Angeles.

Wa pay klaro kon si Belfort nangita ba og ikapuli apan gikataho nga tinguha karon sa mga organizers nga ilang tanyagan si kanhi heavyweight world champion Evander Holyfield, 58-anyos, kinsa katapusang nakaaway niadto pang 2011. (JBM)