Ang biseklita di lang panglumba ug exercise, kon di alang sab ni sa suroysuroy kon ikaw magdaginot. Mao ni ang bike packing. Sikat ni sa Europe tungod sa ilang konektadong mga karsada. Makadaginot ka kay mahimo man nga magdala ka og tolda nga makatulgan ug mga gamit pangluto ug personal hygiene.
Simple ra man kaayo i-convert ang imong biseklita pinaagi sa pagbutang og carrier sa likod ug pagpalit og bike bags. Mahimo ra sab nga magpahimo ka o custom made ang imong bike bag pahaum sa geometry sa imong biseklita. Ang OZ Racing sa akong higala nga si Zandro Fajardo duna ining bike bags. Dugay na kong wa na makasuroy sa iyang shop. Naa pa ba kaha?
Nalingaw kong gatan-aw sa mga post sa akong kanhi kauban sa SunStar nga si Jonolin Luab tungod kay nalingaw siya sa bike packing. Kon kaniadto mosuroy nga nag Nmax o gaawto, lately ang iyang suroy sa lagyo puro na biseklita. Sa akong pagsuwat aning akong lindog, toa siya ug pipila ka mga higala sa isla sa Camotes.
Nalingaw kaayo siya sa iyang bag-ong nadiskobrehan nga hobby. Lahi ra ang biseklita sa de makina nga mga sakyanan tungod kay makaehersisyo ka man sab. Sa motorsiklo ug scooter, paspas ka tuod sa biyahe, apan galingkod ka ra man gihapon. Wa ka maka exercise.
MAS MAKAKITA
Tungod kay hinay ang imong speed, mas makakita ka og daghang mga talan-awon nga imong maagian sa dan. Makalantaw ka sa kaanindot sa kadagatan kon motadlas ka sa mga karsada nga daplin sa baybayon. Labina kon naa ka sa Sugbo, padung ka man sa south o norte.
Sa Camotes, daghan ang mga agianan nga naa daplin sa baybayon. Mahimo ka ra gani nga mohunong, mobukhad sa imong tolda aron maligo sa baybayon.
Sa kabukiran, makapanghupaw ka og lawom sa kaanindot lantawon sa mga berdeng kahoy, pagpaminaw sa mga awit sa mga langgam ug hanggap sa bugnaw nga hangin.
Mas maanindot ang bike packing kon duna kay kauban, at least duha, labina ning atong nasod nga daghan og mga mapahimuslanong kriminal.
Lain nakong higala nga si Engr. Allan Loyao hilig sab og bike packing, but lahi ni siya og level kay tag-as nga mga bukid patagon. Moagi sab og mga trail. Mao ni sila ang grupo sa Team Big Ring (TBR). Suhito ni sila sa mga rota sa trail.
Sagad sab ning ilang biyahe, daghan sila.
UNSA NGA BIKE
Sa mga artikulo nga akong nabasa, dunay duha ka wheel sizes ang sikat sa bike packing, ang 20 inch folding bike ug 26-inch wheel nga mountain bike. Alang nako, mas maayo ang mountain bike kay versatile kaayo kon terrain ang hisgutan.
Sa mga dan nga gubaon ug pagtungas sa hait nga mga bungtod ug bukid, kon anad ka na sa mountain bike, di kaayo lisod ang pagsubida. Mas kasaligan usab ang MTB kon durability ang hisgutan.
Okay lang ang folding bike kon paved roads ang imong agian.Sama sa pananglit sa European countries.
Daghan ang nindot sa mga less traveled nga dapit. Kanang virgin pa kaayo ba nga almost unexplored nga mga lugar. Busa, mas pabor ko sa MTB kay sa 20-inch folding bike kon kining mga lugara ang duawon ug agian.
Mas maayong sugdan na nimog explore ang imong tugkaran hangtod nga anam kang magkalayo. Makasuroy ka, makadiskobre ka og daghang mga dapit nga wa ka magtuong imo ra diay nga maabot bisan sa biseklita lang. Daghan ang imong maduaw sa pagtindak.