Binasi sa Isaias 35:4-7; Salmo 146; Santiago 2:1-5; Marcos 7:31-37
Gihatagan ang matag usa kanato sa Ginuo og gasa sa panghunahuna, paghimog desisyon, ug kagawasan. Milangkob kini sa gitawag nga tawhanong dignidad kay pinaagi sa atong mga desisyon mahiduol kita sa Dios. Sa laing bahin, milangkob usab kini sa pagkagamhanan nato kay gawasnon pod kita nga makahimo og desisyon batok sa Dios. Pagpaduol man o pagpalayo sa Dios, adunay sangputanan ang atong mga desisyon nga dili malikayan.
Usahay adunay mga desisyon nga nagagikan sa atong tawhanong kahimtang, ilabina sa atong pagkasakop sa katilingban. Adunay mga panghunahuna nga makaingon kita nga dili lamang sa usa ka tawo apan sa usa ka katilingban. Kini mga panglantaw nga mabasa nato sa atong mga panultion, sinultihan, awtomatik nga buhaton, mga pagpihig, ug uban pa.
Usahay ang mga katilingbanong panghunahuna makatabang. Usahay dili pod. Kon mapugngan ang usa ka tawo sa pagpasagad sa iyang kinabuhi tungod kay mahadlok siya sa mga komentaryo sa uban, makatabang ni. Kon ang tawo dili na lang magtinarong og trabaho tungod kay masilo ang uban nga nagtinapolan, dili kini makatabang.
“Ug gipahilayo niya siya nga siya ra gikan sa panon sa katawhan,” ang unang lakang ni Jesus sa dihang gidala kaniya sa mga tawo ang usa ka bungol nga maglisod og sulti. Buot tingali ni Jesus nga mahatagan og distansya ang maong tawo sa uban aron dili kini maimpluwensya sa ilang mga huhongihong ug pagtamay ba hinuon.
Dako baya ang hagit nga ginaatobang sa mga tawo nga may “handicap”. Bugalbugalan dayon. Sundogdugon dayon ang sinultian sa amang. Dako ang mga babag ug limitasyon nga ilang giatubang. Mao tingali tong gipahilayo siya sa ubang mga tawo.
Kon, matag karon ug unya, modistansya pod ta sa uban, mas dali natong madungog ang tingog sa Ginuo. “Pagmaisog ug ayaw kahadlok! Moanha ang imong Dios aron sa pagpanimalos sa imong mga kaaway ug siya kamong luwason,” miingon ang Ginuo pinaagi kang Isaias. Makapahingangha ang himuon sa Dios: makakita ang buta, makadungog ang bungol, magluksolukso ang bakol daw lagsaw, ug mag-awit ang amang. Kinahanglan pod kitang mo-distansya, bisag pinaagi sa “social distancing”, kon milagrohan kita sa Dios aron maaninaw gyod nato nga gikan kini sa Dios.
Mahinungdanon pod kining pagdistansya kay usahay aduna kitay mga naandan nga dili maayo apan gidawat lang nato. Naghisgot si Santiago sa kinaiya nga mopalabi sa mga sapian kaysa mga kabos. Nagpahinumdom si Santiago nga “ang Dios nagpili sa mga kabos niining kalibotana aron mahimong dato sa pagtuo ug aron makapanag-iya sa Gingharian nga iyang gisaad sa tanan nga nahigugma kaniya.” Kinahanglan ang pagdistansya aron masabtan ang kinaadman nga mibadlong sa usa ka kinaiya nga dili maayo.
Nakasuway ka na ba nga modistansya sa uban? Unsay may nakaaghat nimo sa paghimo niini? Unsa may bunga?