Nalingaw ko nga nagtan-aw sa video sa miaging sesyon sa Konseho sa Syudad sa Sugbo. Napugos intawon ang mayoriya sa mga konsehal nga mopasar og proposed memorandum of agreement nga motarong sa mga sayop sa Joint Venture Agreement tali sa Cebu City Hall ug Megawide Construction Corporation.
Unsaon sab kining mayoriya nga namirma man sa JVA bisan wa makabasa sa tibuok dokumento. Si Bise Mayor Mike Rama na ang nabalaka dihang nanggawas na ang mga sayop labi na dihang nisang-at og kiha ang Carbon Alliance.
Si Rama na ang nipresentar sa maong MOA. Imbes mohangyo unta og dugang panahon nga matun-an ang maong mga punto sa bise mayor, igo lang nag-recess ang mga konsehal dayon nagbinutohay na.
Sa samang higayon, daw wala makahibawo sa lakang representante sa Megawide. Ang ilang mga trolls daw amaw nga wala mousab sa ilang mga punto. Naglumba lang ang mga hanggaw nga sigig dayeg sa Megawide bisan og ang gihisgutan mao ang mga sipyat sa JVA.
Simple lang ug madunganon ang baruganan sa minoriya, “rescind sa JVA” or bakwion sa Konseho. Ang Carbon Alliance, sa sunod adlaw, nipadayag nga ipadayon nila ang kaso.
Aw, siguradong maulawan gyud og samot kining maong mga konsehal sa mayoriya. Swerte lang sila nga kasagaran sa mga Sugboanon wala makasubay sa nahitabo. Baga-baga sab og lepz kining mayoriya kay wa man sab magpakitag kaulaw sa nahitabo.
Kay ngano bitaw nga wala mobasa sa JVA pagpirma nila? Unya karon, gusto nilang remedyohan pinaagi sa usa ka MOA. Di ba mga hanggaw?
Alang kanako, maremedyohan lang kining ilang kahimtang karon pinaagi sa pagbalik sa uno. Total, kadudahan na man nga makabalik si Mayor Edgardo Labella. Maluoy na unta kini sila nga paantuson pa ang mayor tungod sa iyang sakit.
Tibuok Sugbo
Ubay-ubay na ang nakatuhog nga kining isyu kabahin sa kaayuhan sa Carbon angay gakson sa tibuok katawhang Sugboanon.
Di lang kini isyu sa mga namaligya sa Carbon. Isyu kini sa tibuok Sugbo nga nangiyawat sa kabarato sa presyo sa mga palitunon sa Carbon.
Kon dayunon kining paghimo sa maong merkado subay sa plano sa Megawide, mga adunahan lang ang makataak niini. Mawad-an ang Sugbo og merkado nga makapalit kitag mga baratong produkto alang sa atong mga sari-sari store, mga karenderiya, mga barbikyuhan, mga flower shop, ug uban pa.
Ang mga mabulahan mao lang ang mga world class labi na kining mga nagkapyot sa saya sa Megawide. (DM nako sa @anol_cebu)