Human gisugyot ni Presidential Adviser on Entrepreneurship Joey Concepcion kabahin sa mga bus nga exclusive lang sa mga nabakunahan na batok sa Covid 19, karon iya na usab nga gisugyot ang ‘restaurant bubble’. Unsa man kini? Aw, kadto lamang mga nabakunahan ang puwedeng makasulod ug makakaon sa usa ka restaurant o lainon silag usa ka lugar sulod sa restaurant. Susama ra gihapon kini sa iyang unang sugyot kabahin sa buses alang lang sa mga bakunado.
Wala gihapon kini kalainan niadtong plano ni Lapu-Lapu City Mayor Junard ‘Ahong’ Chan nga kadtong bakunado lamang ang tugutan nga makasulod sa mga grocery, supermarket ug mga merkado sa dakbayan. Apan iyang kining gisalindot human miani og daghang mga pagsaway ug human siya gibadlong ni Presidential Spokesperson Harry Roque. Karon, gisagop na kini sa Cebu City pinaagi sa gibag-o nga Oplan Puyo ni Acting Mayor Mike Rama.
Matod pa sa usa ka magsusulat: ‘We will never have true civilization until we have learned to recognize the rights of others.’ Maoy gipanagan-an sa pipila ka sektor sa atong katilingban nga simbako moabot ang panahon diin magsugod na ang pagbahin-bahin o pagpinig sa atong katilingban sa duha na lang ka matang sa katawhan. Ang mga bakunado o dili bakunado. Usa unya kini sa mas dakong perdisyon nga atong mahiaguman gumikan sa pandemiya. Kon duna na unyay pundok sa mga tawo nga masobrahan sa pagtuo nga ang ilang baruganan mao ang labing husto ug kadtung mosumpaki kanila pag-ingon nga nagpakaboang ug angay nga isalikway.
Manguros na lang tang daan kon simbako mahitabo kini ilabi na kay sa pagka-karon wala pay maayong laki nga mopatunga ug makapangangkon nga ang ilang mga estratahiya mao na ang sakto ug angay nga tumanon.Kon mahinayon man kini, mahulog nga discrimination gihapon. Kana bang adunay pagpihig ug makamugna og pagbahin-bahin sa katawhan. Sa pagkakaron, dili pa kini angay himuon gumikan kay dili pa tanan bakunado. Daghang mga rason kon nganong daghan pa usab ang wala pa mabakunahi. Unya pa ni angay himuon kon hurot-hurot na tanan nga mabakunahan. (bobbygnalzaro@gmail.com)