Trabahante nasaghid sa linya sa kuryente, kritikal

Kritikal ang kahimtang sa usa ka laborer kay nakuryentihan samtang nagtaod og atop nga sin alas 5:05 sa hapon sa Biyernes, Septiyembre 3, 2021 sa Brgy. Bulasa, lungsod sa Argao.

Si Noel Exquiel, 20, ulitawo, taga Bry. Magdugo, dakbayan sa Toledo, kritikal ang kahimtang nga gidala sa Vicente Sotto Memorial Medical Center (VSMMC).

Si Police Staff Sgt. Howard Minopas sa Argao Police Station nga nahinabi sa Superbalita Cebu nagkanayon nga si Exquiel uban sa mga kauban nagtaod sa atop nga sin sa gitukod nga poultry.

Apan aksidenting nasaghid ang iyang ulo sa linya sa kuryente nga mga usa ka metros lang ang gilay-on sa iyang gibarugan.

Gumikan sa kakusog sa boltahi, nakaangkog seryosong mga paso sa kalawasan si Noel una pa siya nahagbong gikan sa atop.

Gidala sa tambalanan sa lungsod sa Argao, apan kay kritikal, gibalhin sa tambalanan sa dakbayan sa Sugbo alang sa dugang pag-atiman. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph