Unsay nahitabo sa Partido Barug-PDP Laban? Padung kaha kining mabuak?
Usa ka buwan sa di pa ang filing sa certificate of candidacy (COC), si Cebu City Councilors Donaldo “Dondon” Hontiveros ug Phillip Zafra, puros mga konsehal gikan sa Cebu City south district, nag-post sa ilang tagsa-tagsa ka Facebook account og “INDEPENDENT” sa Biyernes sa gabii, Septiyembre 3, 2021.
Gikompirmar ni Zafra atol sa interbyu sa Septiyembre 4 nga mohawa siya sa Barug, apan si Hontiveros wa pa mokompirmar kay gikataho nga toa pa sa kaulohan.
Sa lahi nga interbyu, si Konsehal James Anthony Cuenco niingon nga “seriously considering doing so myself,” kun nagkonsiderar usab siya sa pagbiya sa partido.
Matod ni Zafra nga di pa siya sigurado kon modagan ba siya sa umaabot nga eleksyon sa Mayo 2022.
“It does not necessarily follow nga modagan ko. Depende na sa sitwasyon,” matod ni Zafra.
Mohawa siya sa grupo aron maka-focus siya sa paghatag og serbisyo sa publiko.
“I can be with, not just the party which I used to belong before, but also to the other party, most importantly to the people, nga maka-discuss ta freely with them and I don’t want to be instructed by any political partisanship,” matod ni Zafra.
“Para nako mas maayo ang pag-atiman nato, in particular sa Sugbo, kon wala tay political consideration,” segun niya.
Niingon sab si Zafra nga wa siyay plano nga moapil og laing political party nga nagpasabot nga di usab siya motipon sa Bando Osmeña Pundok Kauswagan (BOPK).
Iya sab nga giklaro nga wala’y gubot nga nahitabo sa Partido Barug nga nakapakombinser kaniya nga mohawa sa grupo.
Si Hontiveros, atol sa pagsuwat, wa pa naghatag sa rason sa iyang Facebook post. Di sad siya motubag sa mga tawag.
Si Zafra nahibung sad sa Facebook post ni Hontiveros.
Matod niya nga wa pa sila magkaestorya tungod kay si Hontiveros anaa pa sa Manila.
Si Cuenco nalipay sa desisyon ni Zafra nga mag-independent.
“I am actually happy about his decision to go independent. Truth to tell, I am seriously considering doing so myself. No further comment until then,” matod ni Cuenco sa iyang text message ngadto sa SunStar Cebu.
Si Councilor Joel Garganera niingon nga wa pa niya mahinabi ang iyang mga kauban sa politika ug mas maayo nga ihatag sa niya ang tibuok weekend ngadto sa duha.
“It’s weekend, let’s give it to them,” matod niya.
Si Konsehal Prisca Niña Mabatid, sa iyang mensahe nga gipadala sa SunStar Cebu, niingon nga mahiuli ra ang ilang grupo sa di pa ting-file sa COC.
“The coast will be clear before filing. In the end I know that our group will be okay. Our captain will not allow our boat to sink,” matod ni Mabatid.
“Mayor Mike will stand up for all of us. Pinangga na niya si Phillip ug si Dondon that I am sure of,” segun sa konsehal.
Gisuwayan og kuha sa SunStar Cebu ang habig ni Cebu City Acting Mayor Michael Rama isip party president, apan di siya matawagan.
Gisuwayan sab og kuha sa SunStar Cebu ang habig sa ubang mga miyembro sa Barug, apil na si Mayor Edgardo Labella nga nag-leave karon, apan wa pa sila motubag atol sa pagsuwat.
Si Labella wa nay tinguha nga magpasubli tungod sa iyang panglawas.
Niadtong 2019 elections, si Rama modagan unta sa pagka mayor, apan nakombinser siya sa mga kauban sa paghatag og agianan kang Labella. (dugang taho ni REV)