Human pormal nga gibuksan ang drive-thru vaccination sa Noah Complex nga anaa nahimutang sa South Road Properties (SRP), nagplano ang Cebu City Vaccine Advisory Board nga magbutang sab og samang pamaagi sa pagpamakuna sa SM City Cebu.
Niawhag sab ang Board sa sektor sa transportasyon nga mopahimus sa drive-thru service.
Gisugdan sa Board ang drive-thru coronavirus disease 2019 (Covid-19) vaccination sa New Normal Oasis for Adaptation and a Home (Noah) sa SRP niadtong Sabado, Septiyembre 4, 2021.
Si Noah manager Jocelyn Pesquera niingon nga pagahimuon lang ang drive-thru service matag Sabado, gikan sa alas 8 sa buntag hangtod sa alas 4 sa hapon.
Matod ni Pesquera nga maabot sa 300 ang maserbisyoan sa usa ka adlaw.
Kinahanglan magpa-appointment daan ang mga mo-avail sa drive-thru service pinaagi sa Vaccine Operations Center o Vice Mayor’s Office o City Health Department.
Matod ni Pesquera nga priority sa drive-thru vaccination ang mga senior citizen ug persons with comorbidities.
Apan kon adunay mga individual nga sakay sa sakyanan bisan og wa naapil sa Priority Codes A2 ug A3, mamahimo sad sila nga bakunahan, matod ni Pesquera.
Ang dakbayan sa Sugbo nakig-coordinate sab sa transportation sector aron ang mga drayber, labi na ang mga nagdala og pampublikong pasaheroan sama sa taxi, bus, ug habal-habal, mabakunahan.
Kinahanglan iparehistro daan ang mga drayber ug operator sa programa pinaagi sa pabakunata.com.
“Importante para sad sa atoang commuting public na they will feel confident nga when they ride public vehicles like taxis and jeepneys nga ma-feel safe sad sila,” segun ni Pesquera.
Si City Health Department (CHD) officer-in-charge Dr. Jeffrey Ibones miingon nga ang pamaagi nga iimplementar sa Noah Complex himuong template aron maoy sundon sab unya sa SM City Cebu.
Matod ni Ibones nga i-assess nila ang dagan sa drive-thru aron mapalambo pa ang programa.
Sa Lunes, Septiyembre 6, mag-abli og laing vaccination site ang Board sa Southwestern University PHINMA.