GUMIKAN sa pag-abot sa igong supply sa bakuna sa Ormoc City, ipahigayon na sa matag barangay ang vaccination rollout.
Unahon sa City Health Department ang top 10 barangay nga dunay pinakadaghan og natala nga kaso sa Covid-19.
Nag-una niini ang Barangay Cogon nga dunay 156 cases; San Pablo dunay 131 cases; Linao dunay 123 cases; San Isidro dunay 122 cases; Tambulilid dunay 119 cases; Ipil dunay 96 cases; Doña Feliza Mejia dunay 92 cases; Punta dunay 91 cases; Bagong Buhay dunay 85 cases ug Can-adieng dunay 73 cases.
Apan kini tanang kaso toa sa isolation facility sa Dolores ug wala sa barangay.
Giaprobahan na ni Dr. Edmund Keirulf nga sunod semana magsugod na sa pagpamakuna sa taga Cogon, San Pablo ug Linao.
Sa Septiyembre 6-7 ang pamakuna sa taga Cogon adto sa SM Center; sa petsa 8 ang pamakuna sa taga San Pablo adto sa ilang covered court, ug petsa 9-10 ang Linao adto sa Gaisano Riverside.
Ang barangay na ang gitahasan sa masterlisting sa nga wala pa nabakunahi, sila usab ang mopili sa lugar kung asa ipahigayon ang pagpamakuna ug mo tabang sa pagplastar sa vaccination site.
Duna gihapon priority lane para sa A2 o mga senior citizens, A3 o persons with comorbidities, duna sab sa persons with disabilities ug duna sab priority lane sa A5 o kadtong mga miyembro sa Pantawid Pamilyang Pilipino Program.
Modawat usab ang barangay vaccination site og mga nalista nga mga A4 o essential worker pero dapat duna sila'y ipakita nga code nga gi-text.
Ang mga nagpuyo sa matag barangay dapat magpakita og ID o bisan unsang dokumento nga dunay address aron masiguro nga naa gyod sila sa maong barangay nagpuyo.
Pwede usab ang opisyal sa barangay ang magpamatuod kay naa man sila atol sa pagpamakuna.
Dawaton usab sa barangay vaccination site ang mga tawo nga nagtrabaho sa ilang barangay bisan og wala kini nagpuyo sa maong barangay.
Ipakita lang nila ang mayor's permit nga dunay address ug certificate of employment or ID nga dunay pirma sa ilang labaw.
Gipaniguro sa LGU-Ormoc nga sa katapusang semana sa Oktubre, mahuman na ang pagpamakuna sa dakbayan. (JKDP)