Nadela: KBP Month panahon sa pandemiya
Akong yukbo sa Kapisanan ng mga Brodkaster ng Pilipinas (KBP) Cebu Chapter ug sa mga kaubang brodkaster atol sa kasaulogan sa KBP Month 2021. Ikaduha na ni nga kasaulogan nga ang pandemiya niputol sa tradisyon sa pagbukas sa selebrasyon nga himuon pinaagi sa usa ka mabulokon nga parada, santos nga misa ug mga presentasyon sa matag radyo ug TV station nga sakop sa kapunongan. Kutob nalang ta sa paghandum kay lagi ang health protocol hugot man nga nagdili sa mga tapoktapok. Kinsay makalimot sa mga programa sa opening salvo hangtod na sa closing program.
Diha toy panahon nga matag adlaw, ang nagkadaiyang departamento sa usa ka sibyaanan motagana gyud og mga presentasyon sa usa ka gabii sa dili pa ang culmination night. Pananglit ang News ang Public Affairs Department. Usa ka gabii nga ang mga reporter ug anchor mosalida sa entablado nga may banda pa nga moapil og lingaw sa mga bisita. Naka-host sab ko ka usa ani diin ang ka alegre ilabi na ang raffle sa mga nindot nga items maoy labing kulbahinam nga bahin sa programa.
Mao sab sa Drama Night, Engineering Night, Admin ug uban pang departamento modumdum sa ilang naandang tulomanon isip pagpalambo sa diwa sa panaghiusa sa mga tawo nga nag-alagad sa industriya. Tungod ni Covid-19, napapas ang tanan. Limitado na kaayo ang kalihukan. Hinuon bisan pa man sa pandemiya, nakita nga mas lagsik ug determinado ang KBP pagtuman sa iyang responsibilidad alang sa mas mabungahon nga panibya.
Di ba tinuod nga nisamot ka sensitibo ang papel sa KBP ning panahon sa pandemiya. Dili lalim ang mangita og balita nga gisap-ongan ang katunga sa nawong nianang face mask. Nakasulay ko og sul-ob ana pipila na ka tuig ang nakalabay. Kadtong flash flood sa Ormoc City maoy akong gipasabot.
Ang face mask gisul-ob sa halos tanang tawo nga akong nahinagbuan sa mga dapit nga naigo sa makalilisang nga baha. Ang rason mao ang di masingo nga kabaho tungod sa daghang nangamatay atol sa trahediya. Taudtaod sab mi didto. Kay gawas sa pagpangita og balita, nagpahigayon man sab mi og relief operation para sa mga biktima.
Kinsay magtuo nga ang pagsul-ob og face mask niadtong panahona masundan paglabay sa katuigan. Dili basta basta kay tibuok kalibutan ang naghimo niini. Ang pandemiya wala gyud damha nga niabot ug nipugong sa atong panlihoklihok. Ang nakaparat ra ba kay sama sa ubang isyu, ang pandemiya gikaluhaan sab og fake news gikan sa nagkadaiyang tinubdan. Mga fake news nga sagad mokatap diha sa social media may labot sa pandemiya.
Mao ni ang hagit sa KBP ning panahona, unsaon pag-alkontra sa mga mini nga propaganda labot sa Covid-19.
Mabuhi ang KBP!