Mga pulis sa Island Garden City of Samal (Igacos) nilusad og manhunt batok sa tawo nga nilunggo sa liog sa upat ka mga itoy sa Barangay San Miguel ug P15,000 nga ganti ang gitagana alang sa makatudlo sa tawo nga naghimo niini.
Ang mga itoy nakaplagan nga gilunggoan sa usa ka luna sa Barangay San Miguel sa Septiyembre 4, 2021. Gitaho dayon kini ngadto sa sa mga barangay official ug nahibaw-an dayon nga ang panglunggo nahitabo sa Septiyembre 3.
Pasiunang imbestigasyon nagpakita nga ang tag-iya sa mga itoy nimando sa paglabay kanila tungod sa kadaghan sa mga pulgas, apan nanghimakak ang tag-iya nga siya ang nanglunggo.
Si San Miguel Barangay Captain Dionn Phillip Heramil nintanyag og P5,000 ug usa ka Sir Jimmy nitanyag sab og P10,000 isip ganti sa mga tawo nga responsable sa krimen.
“Kung kinsay makatudlo sa pag patay sa 4 ka itoy ug pagpotol sa mga ulo niini adunay madawat nga reward worth P5,000 gikan sa atong maabtikon nga kapitan Dionn Phillip Heramil ug P10,000 gikan kay Sir Jimmy, nag total sa kantidad nga P15,000,” matod sa Barangay San Miguel Igacos sa usa ka Facebook post.
Ang Bantay Hayop Davao nikondenar sa hitabo ug nisaad nga motabang sa imbestigasyon.
“The viral photos of 4 puppies around 2 to 3 months old that started yesterday was a shocking sight, painful, unacceptable and unforgiveable. Karumal-dumal. Isang kawalang respeto at kawalang dangal. Masahol pa sa isang halimaw ang gumawa nito at sa tingin namin ay hindi ito normal,” matod niini sa usa ka Facebook post. (LMY)