Ang low pressure area (LPA) silangan sa Surigao del Norte nahimo nang tropical depression kun bagyo sayo sa Lunes, Septiyembre 6, ug ginganlan og “Jolina.”

Sa alas 10 sa buntag sa Lunes, ang sentro ni Jolina nahimutang sa 205 kilometros east southeast sa Guiuan, Eastern Samar, o 230 kilometers east northeast sa Surigao City, Surigao del Norte.

Ang bagyo nag-irog sa padung sa kasadpan sa 15 kilometros matag takna.

Ang bagyong Jolina dunay maximum nga gikusgon hangin nga 55 kilometros matag takna duol sa iyang tunga-tunga ug unos nga 75 kilometro matag takna.

Ang Philippine Atmospheric Geophysical Astronomical Administration (Pagasa) niingon nga ang mga dapit nga ubos sa Tropical Cyclone Wind Signal (TCWS) Number 1 giisa sa Sorsogon sa Luzon; Northern Samar, Samar, ug Eastern Samar provinces sa Kabisay-an; ug Dinagat Islands, Siargao Islands, ug Bucas Grande Islands sa Mindanao.

Matod sa Pagasa nga kusog nga hangin nga dunay panagsang unos masinati sa mga dapit ubos sa TCWS No. 1, ug sa mosunod nga 24 oras, si Jolina hayan magdala og igo-igong bawod nga dunay gitas-ong 1.2 ngadto sa 2.8 metros sa eastern seaboards sa Kabisay-an ug Mindanao.

“Mariners of small seacrafts are advised to take precautionary measures when venturing out to sea. Inexperienced mariners should avoid navigating in these conditions,” matod sa advisory.

Sa forecast track, ang bagyo gibana-banang mag-landfall sa Northern Luzon sa Biyernes, Septiyembre 10.

Matod sa Pagasa nga kalagmitan ang bagyong Jolina magpabiling tropical depression hangtod mag landfall sa Northern Luzon hangtod nga mohinay ug mahimo na lang LPA. (LMY)