Ipadayon sa Cebu City Government og tukod ang mga nitso sa upat ka mga sam-ang sa Dakbayan sa Sugbobisan kon inanay nang niubos ang gidaghanon sa mga nangamatay sa coronovirus disease (Covid-19).
Kini ang gipadayag ni north district Cebu City Councilor Jerry Guardo kinsa maoy gitahasan ni Mayor Edgardo Labella sa pag-coordinate aron mapadali ang katukoran sa mga nitso.
Si Guardo nagkanayon nga bisan kon nikunhod na ang gidaghanon sa nangamatay sa virus, ila gihapong padayon ang pagtukod sanglit magamit kini alang sa mga nangamatay sa laing mga sakit.
Sa Lunes, Septiyembre 6, 2021, usa ka 80 anyos nga namatay sa Covid-19 gilubong sa sementeryo sa usa sa mga nitso Luz nga gi-construct pinaagi sa private sector nga giorganisar ni Guardo.
Nagpasalamat ang pamilya sanglit wa na sila maglisod pagpalubong sa ilang inahan.
Dugang ni Guardo nga hangtod anaa pa ang Covid-19, padayon nga adunay makalas hinungdan ipadayon sa Siyudad para dili na maglisod ang mga tagtungod sa namatay pagpangita og espasyo.
Sa Agusto, niabot og 281 ka mga tawo ang nangamatay sa Covid-19, mas taas kini og duha ka fatality itandi sa pito ka buwan gikan sa Enero hangtod Hulyo niining tuiga nga adunay 279 ka patay.
Human nibuylo ang kaso sa Covid-19 ug nisulbong ang gidaghanon sa nangamatay, karon kalit usab kini nitibugsok sa unang semana sa Septiyembre nga aduna ray 10 ka patay.
Apan matod pa ni Garganera nga bisan kon kalit nga nikunhod ang fatality rate, dili gihapon maayo sanglit adunay kinabuhi ang nakalas.
Base sa usab sa record sa Emergency Operations Center (EOC), ang Septiyembre 5 maoy nag-inusarang adlaw gikan sa Agusto nga way kinabuhi nga nakalas sa Covid-19.
Bisan pa niini, determinado ang City Government nga ipadayon ang katukoran sa tag 290 ka nitso sa sam-ang sa Calamba, Carreta, Talamban ug Luz para dili na unya maglisod ang mga pamilya sa namatyan tungod sa Covid o wala sanglit adunay giandam nga lubnganan ang Dakbayan. (PAC)