BISA'G puol na ang paghisgot kabahin sa Covid-19 apan napugos ko sa pagsulat tungod sa personal nako nga nasinating kaso sa niaging semana.
Gibalita nga nikuyanap na sa daghang lugar sa nasud, apil na niini ang Davao City ang Delta Variant nga mas grabe ka mangtas motakod sa kadaghanan ilabi na sa mga hamtong ug may sakit.
Sa niaging semana, sakit kaayo ang nahitabo sa akong higala nga si Jose Neri "Nono" Alminaza nga namatay niadtong gabii sa Agosto 30 tungod sa Covid. Kanhi Manager siya sa DXGN sa Davao ug usa pa ka radio station sa Midsayap, North Cotabato.
Apan ang iyang kamatayon dili maoy una sa ilang pamilya. Niadtong Agosto 26, akong nahibal-an nga namatay sab ang iyang hamtong nga anak nga lalaki tungod sa atake sa kasingkasing apan gidudahan nga may komplikasyon sa Covid.
Wala na siya gipa-swab kay matud pa sa ilang higalang nurse, seguradong positibo sa Covid ang resulta busa gidali ang iyang pagpalubong.
Apan sa wa pa malubong ang iyang anak gidala si Nono sa hospital tungod sa problema sa pagginhawa. Daghan nang sakit nga gibati si Nono ug angayan na siyang magpailawom sa dialysis.
Tungod sa iya usab nga sakit, wala pa siya mapabakunahi batok sa Covid. Gitakda na unta ang iyang pagpabakuna sumala sa iyang doktor.
Gidala siya sa ICU (intensive care unit) ug nakahinabi pa sa iyang cell phone sa usa nako ka higala apan sa pagkagabii, nabugtoan na kini sa iyang gininhawa.
Apan wa pa mahuman ang iyang istorya. Anaa karon sa ICU ang iyang kinamagulangang anak nga lalaki samtang gisulod sa "isolation facility" ang iyang asawa kay nag-positibo pud. Niadtong Sabado, gi-cremate na ang iyang patayng lawas. Ang nakaparat kay hangtud karon wa pa kahibalo ang iyang asawa ug anak nga namatay siya.
Sakit gyud kaayo ang nahitabo sa iyang banay. Niadtong Hunyo, namatay sab ang iyang inahan nga nagpangedaron og 88 anyos tungod sa sakit.
Among gipadangat ang among pahisubo sa pamilyang Alminaza ug sa tanang nagbangutan tungod sa pandemya sa tibuok kalibutan.
Sa Septiyembre 5, niabot na'g sobra 2 milyon ang nagkasakit sa Pilipinas samtang 90.8 porsiyento ang naayo, 7.6 porsiyento ang aktibong kaso, ug 1.65 porsiyento o 34,234 ang nangamatay. Apil na niining datos si Nono. Daghan pang istorya sa pamilya nga susama o mas grabe pa niini. Niadtong niaging tuig, namatay sa Covid si Dodong Solis, usa ka batikan ug iladong magsisibya sa radyo sa Davao.
Base sa istorya, hapit duha ka semana sab nga natanggong sa morgue ang iyang patay'ng lawas tungod kay walay paryente nga makaatiman.
Ang iyang asawa ug duha ka hamtong nga anak nasulod usab sa "facility" kay positibo. Ingon niini kalisod kung mataptan sa maong sakit nga hangtud karon wa pay klarong tambal nga makaayo nga girekomenda sa World Health Organization ug sa ato mismo nga DOH.
Akoa sab nga pahisubo sa pamilya ni Bro. Venir Del Rosario nga usa ka dakong haligi sa Basta Ikaw Lord (BIL). Gitawag namo siyang bishop tungod sa kadako sa iyang natabang sa organisasyon.