PATAY human nadakin-as ug nalumos sa busay ang usa ka ulitawo samtang nag-selfie sa Cotabato City alas 10:45 sa buntag Dominggo, Septiyembre 5, 2021.
Giila ang namatay nga si Mohammad Datumanong, 20, nagpuyo sa Campo Muslim, Barangay Bagua 1, Cotabato City.
Matod kang Maguindanao Provincial Police Office Director Colonel Jibin Bongcayao nga sadya nga nag-bonding ang biktima ug iyang pamilya sa Bubuludtua falls sa Barangay Nabalawag, Barrita, Maguindanao Province.
Apan tungod kay nadani siya sa kaanindot sa busay, nauwahi siya sa iyang pamilya aron nga mag-selfie ug magpa-picture.
Kalit lang nahanaw sa panan-aw sa pamilya ang biktima human nga nahulog kini sa busay, hinungdan nga gidali og salom sa mga kauban niini.
Gisulayan pa og luwas ang biktima pinaagi sa first aid apan namatay gihapon siya.
Dako ang pagtuo sa pamilya nga sa pagkahulog sa biktima, naparok ang iyang ulo sa bato nga maoy hinungdan sa iyang kamatayon.
Samtang, nipasidaan ang lokal nga panggamhanan sa Barira sa mga mosuroy sa Bubuludtua Falls nga mag-amping aron malikayan ang disgrasya.