Mongaya: Pulitika nga gubot pas lukot

Mikalit og kalami ang gubot na daan nga politika sa Siyudad sa Sugbo dihang nipadayag og pagka independente silang Konsehal Dondon Hontiveros ug Phillip Zafra sa miaging semana.

Buot ipasabot ba kini nga dili na sila mopaubos sa Barug, Kusug, ug Panaghiusa sugod karon hangtod sa Mayo 2022? Modesisyon na sila nga buwag sa party decision diha sa Konseho?

Makita ta kon unsay ilang buot ipasabot sa independent sa sunod nga mga adlaw. Basta alegre ang akong nadunggan.

Kini man gud si Dondon kay buot ni Bise Mayor Mike Rama nga padaganon isip bise mayor. Di gusto si Rama nga iyang ka-tandem kay si Konsehal Raymund Garcia. Duna na man untay blessing daw ni Opav Mike Dino ang Rama-Garcia tandem.

Dunay nagsulti nako nga wa makauyon si Dondon nga mag-bise mayor kay amigo sab niya si Raymund. Busa aron way makabuot niya, mag-independent na lang.

Katuohan si Dondon. Apan kini si Konsesal Phillip Zafra giilang loyalist gyud ni Mayor Rama. Ug di ko makatuo nga kining iyang mga lakang karon way pagtugot sa bise mayor nga nahimong acting mayor karon.

LABELLA

Matod pa, namugna ang Rama-Garcia tandem aron na makapahuway unta si Mayor Edgar Labella gikan sa mga buluhaton sa Cebu City Hall. Bisan pa man og moinsister gyud kini og work-from-home, maklaro na man nga dili siya makalahutay o mosamot kayagaw ang kahimtang sa siyudad ug sa ilang Partido.

Ang nakaapan lang kay ubay-ubay og mga isyu ang Labella team.

Pananglitan, nagpadayon pa ang isyu sa basura. Kay nganong nahurot man dayon ang P400 milyones nga budget alang sa paghipos sa mga basura sa Syudad sa Sugbo?

Dakong kwaki ra ba ang aktwal nga nalabay sa Docast ngadto sa sanitary landfill sa Arn Central diha sa barangay Binaliw kon itandi sa kwarta nga ilang gidawat gikan sa panudlanan sa Syudad sa Sugbo.

Laing dakong isyu man kining wa maayo pagkaplantsa nga Joint Venture Agreement tali sa Cebu City Hall ug ang Megawide Construction Corporation. Gani, napugos ang mga konsehal sa Barug pinanguluhan ni Konsehal Garcia nga mouyon sa gibuhat nga MOA ni Rama. Ang MOA pruweba nga nasayop ang mga konsehal nga namira sa JVA nga wa basaha ang tibuok dokumento.

Kon nag-independent silang Hontiveros ug Zafra, buot ipasabot nga humok na kaayong mawad-an og mayoriya ang Barug diha sa Konseho. Unsaon na lang. (DM nako sa @anol_cebu)