Hapit na magduha ka mga semana nga ubos na sa 200 ang mga kaso sa coronavirus disease 2019 (Covid-19) sa Siyudad sa Sugbo sumala sa mga talaan sa kagamhanan. Bisan ang mga punerarya niingon lahi na ang lakat sa ilang trabaho itandi niadtong Agusto 2021.
Gipaabot ni nga mohinayhinay og kanaug tungod sa mga restriction nga gipatuman sukad gipailawom ang tri-cities sa modified general community quarantine (GCQ). Ingon ani man gyud ang dagan sa mga kaso sa Covid-19 kon magpahugot na usab sa restrictions, sama sa curfew, pagpanakop sa di motuman sa mga health protocol, liquor ban, ug uban pa.
Kon molugak na sab ang restrictions, sama niadtong dul-an sa usa ka tuig nga modified general community quarantine (MGCQ), mobalik na sab ang mga tapok tapok. Naa na sab unyay mga party, labina sa mga dapit nga naa sa mga suok.
Bisan kon mahibalik pa ang lugak nga quarantine classification sa tulo ka mga siyudad, mas maayong ipadayon ang hugot nga pagpatuman sa curfew, pag-limit sa mga tapok tapok, sa mga birthday party ug mga kasal.
Gikinahanglan ang way tihik tihik nga implementasyon sa kapulisan sa curfew bisan sa kasuokan sa mga barangay.
Ipadayon ang liquor ban o inom sa mga bar ug ang itugot lang mao ang pagpamaligya sa alcohol, apan sa balay lang ang imnon. Dugangan ang kapasidad sa mga kan-anan nga magpa dine in, apan estrikto gihapon ang pagpatuman sa mga health protocol.
Nganong kinahanglan ipadayon ang hugot nga pagpatuman niini nga mga lakang? Namatud-an na man gud nga matag palugak sa mga restriction, mobalik na sab og kompyansa ang mga tawo. Magtago-tago man gani sa panagtapok bisan nag MECQ. Sagad gud sa mentalidad sa mga tawo, maora og lansang, kinahanglan pang pukpokon aron modulot.
Unyag kada lugak, hinayhinay sab nga mosaka ang mga kaso sa Covid. Balik na sab ta sa uno. Kapoy na, di ba?