NAG-VIRAL sa social media ang lungon nga lulan ang patay nga gitabok sa nagbaha nga sapa niadtong miaging adlaw didto sa Aleosan, North Cotabato.
Napugos ang mga kabanay ug paryente sa namatay nga isakay sa balsa nga gama sa mga punoan sa saging ug itabok sa sapa nga nagbaha gumikan kay way laing kaagian padulong sa balay sa namatay didto sa Barangay Palacat sa nahisgutang lungsod.
Nitaas ang tubig sa sapa tungod sa way-puas ang pag-ulan sa nahisgutang lungsod.
Ang mga kabanay sa namatay ug uban nilang mga silingan nagtinabangay nga maghimo og balsa gamit ang mga pinutol nga punuan sa saging diin gisakay ang lungon.
Malampuson nga nakatabok sa sapa ang lungon ug gihaya na ang namatay sa ilang pinuy-anan.
Dugay nang naghangyo ang mga molupyo sa Barangay Palacat ngadto sa lokal nga kagamhanan sa Aleosan ug sa kapitolyo nga unta mabutangan og taytayan o kaha hanging bridge ang sapa aron nga di sila maglisud sa pagtabok, ilabi na gyud kon baha. (EEF)