NAGKADAGHAN ang pabor nga gitanyag sa mga pribadong estabilisemento ug lokal nga kagamhanan ngadto sa mga tawo nga nakakompleto sa pagpabakiuna batok sa Covid-19. Dunay naghatag og diskwento sa ilang baligya ug serbisyo. Samtang, sayon na lang mobiyahe ang nabakunaha human dili na pangayoan og negatibong resulta sa swab test ug ipakita lang ang card sa bakuna sa border control ug uban pang dokumento.
Kini nimugna og pagsaway sa pipila sa supak sa pagbakuna tungod sa nagkalainlaing rason. Matod pa, kalapasan sa tawhanong katungod. Alang kanila, ang pagpabakuna o pagtagdog sa lawas katungod sa indbiduwal sa pagtugot o dili. Kon pugson, kini usa ka matang sa paglapas sa tawhanong katungod sa pagpili nga gipaneguro nga masunod, sumala pa, Batakang Balaud isip nasod nga nagpatunhay sa demokrasya.
Ang Philippine Commission on Human Rights (PCHR) wala pay komentaryo bahin sa katungod sa pagpabakuna. Atol ning pagsuwat, ang komisyon nagtuki alang sa paglatid og polisiya sa pagpabakuna labina batok sa Covid-19 nga dunay nagdumili niini. Kalapasan ba sa balaud o tawhahong katungod sa pagpihig sa walay bakuna bahin sa paghatag og diskwento o mga insentibo sa nabakunahan na?
Apan ang dayag nga kamatuoran: kabahin kita sa organisadong komunidad o kagamhanan nga nagsunod og batakang lagda aron magpabiling lig-on isip nasod pinaagi sa hukom sa mayoriya, diin dugokan sa demokrasya. Busa ang atong katungod tataw nga dunay limitasyon labi na sa emerhensiya.
Ang paghatag og pabor sa kompleto sa bakuna, kabahin sa pagpaningkamot nga mapadali ug mas daghang mabakunahan aron pagkab-ot sa herb immune community o ang pagsanta sa virus sa mayoriya na sa populasyon ang bakunado.
Pinaagi niini, maplastada na sa hingpit ang bag-ong normal sama sa ubang nasod karon.