MOBALIK na karong adlawa, Septiyembre 8, sa iyang trabaho si Cebu City Mayor Edgardo Labella sa City Hall. Ang numero otso maayong signos sa Feng Shui. Gipili ba kaha kini ni Labella? O natayming lang sa pagbalik sa iyang trabaho?
Sugod sa Septiyembre 8, adlaw usab sa pagpaubos sa general community quarantine (GCQ) sa Cebu City, Mandaue City ug Lapulapu City gikan sa modified enhanced community quarantine (MECQ) status.
Samtang, inugorahan karon ang bag-o nga dakong hotel sa Siyudad sa Sugbo nga gipanag-iya sa pamilyang Insek.
Ang kadaghanan sa akong mga amigo naa gyuy duha ka otso o 88 ug ang uban tulo kay pangpabuwenas, matod nila.
Basin pinaagi sa numero 8, maayo ang kahimtang sa panglawas. Nagdalag buwenas sa negusyo ug uban pa nilang kalihukan matag adlaw.
Gikalipay sa kadaghan ang dakong paglambo sa health condition ni Labella, bisan ang uban gusto gayud nga makita ang mayor nga maglakaw aron motuo.
Base sa akong mga interview sa suod sa mayor, maayo ang kahimtang sa mayor sama sa pahibawo ni Konsehal Raymond Garcia.
Si Garcia usa sa mga suod ni Labella ug unya gihugonhugonan nga modagan sa pagka bise mayor.
Si Jepoy Labella, modagan sa pagka konsehal sa Siyudad sa Sugbo, nipahibawo nga maayo na iyang papa nga mayor.
Mao sab ang pahibawo ni Atty. Floro Casas, ang Cebu City administrator ug trusted man ni Labella, puwede naman gani magbakasyon sa gawas apan naa pa lang ang pandemiya.
Samtang, di mokompyansa ang katawhan niining pagpaubos sa GCQ sa tri-cities.
Si Konsehal Joel Garganera, deputy chief implementer sa Emergecy Operation Center (EOC), atol sa among panagsulti nga itugot ang indoor sports sama sa badminton apan kadto lang fully vaccinated.
Mao sab gisulti ni Acting Mayor Mike Rama sa akong interview nga tugtan ang mga fully vaccinated aron pagdasig sa mga tawo nga wala pay bakuna. (Email: efrenlonzon71@gmail.com, Text:09235562777)