DAKONG problema ang atubangon sa modaog nga presidente sa sunod tuig.
Akong pasabot, problema tungod sa mga panghitabo karong mga panahona, sama sa padayon nga “bugno” sa Office of the President ug ang Senado kabahin sa isyu sa matod pa, kwestiyonable nga mga transaksiyon sa Department of Health (DOH) ug sa Department of Budget and Management (DBM) procurement service.
Dako kini og epekto sa proposed budget para sa 2022. Pananglit, mosugot pa kaha ang Senado sa budget sa DOH para sunod tuig kon di matubag ni Secretary Francisco Duque ang mga pangutana sa mga senador?
Sa sunod tuig, adunay piniliay pagka-presidente sanglit mahuman na man ang termino ni Pres. Rodrigo Roa Duterte (PRRD) sa udto sa Hunyo 30, 2022.
Pasabot, bag-o nga presidente, bag-o nga mga opisyales sa gobierno, apil ang mga sakop sa kabinete. Kon sundon nato ang mga nangaging tuig, kasagarang mahitabo, adunay mga bag-ong mga plano, bag-ong mga patakaran ug bag-ong mga programa.
Gawas sa mga kabag-ohan, adunay giatubang nga problema ang bag-ong presidente–ang Mandanas doctrine nga ipatuman na sunod tuig. Dakong kausaban ang mahitabo sanglit adunay adjustment nga pagahimuon sa pahat sa local governent units (LGUs) sa ilang internal revenue allotment (IRA).
Modako ang ilang pahat sa IRA, ilabi na kadtong dagko nga LGUs. Unsaon nila pag-gasto ang maong kwarta, sayon litokon pero lisod buhaton. Labi na kadtong LGUs nga gipangulohan sa mga lider nga di gusto makat-on sa pangatungdanan o kadtong mga lideres nga midaog sa piniliay tungod sa kuwarta.
Tungod sa kagubot sa senado karon, mogawas pa kaha ang budget nga gipangayo sa Office of the President?
Tsismis ni ha.
Kinsa kaha ning mayor nga kon tan-awon nimo, lalake gyod kaayo. Way makitang timailhan nga aduna diay sekretong kinaiya. Pero kon mahubog na, mogawas na ang natural–moladlad na.
Unsaon man niya pagladlad? Matod pa, mahilig kuno mang-gakos og kon mahimo, manghalok.
Yes, manggakos ug manghalok sa iyang naangayan nga lalake. Matod pa, basta moandar na ang maong mayor, di na magtagad og kinsay makakita sa iyang gibuhat.
Mao nay giingon nga moladlad gyod.
Nahimong sumsuman sa mga tabitabi ang maong mayor, labi na kay daghan ang nakasaksi sa iyang pagladlad.
Resulta, daghan na ang mga mata nga magtan-aw kon mosugod nag tagay ang maong mayor. Labi na gyod kon ilang makita nga magsugod na og pamula ang nawong sa mayor.
Huwaton na lang nila nga mogawas na sab ang natural.