SPECIAL Investigation Task Group nga nakatutok sa imbestigasyon sa pagpatay kang manlalaban Rex Fernandez nagtuo nga dunay tawo nga “insider” kay ilang nasuta nga dunay kasayuran ang killers sa iyang lakaw sa wa pa siya gi-ambush niadtong Agusto 26, 2021.
Sa ilang nakuha nga closed circuit television (CCTV) footage, nakita nga lima ka minutos una naabot sa Banawa si Fernandez ug mga kauban, nakaposisyon nang daan ang gunman sa usa ka eskina diin nahimutang ang usa ka bakeshop.
Nasuta kini sa mga sakop sa SITG sa ilang pagkuha sa mga CCTV camera sa Banawa.
Dinhi nasuta nga lima ka minuto sa wala pa moagi ang sakyanan sa manlalaban paingun sa Apple One condominium nga nahimutang Good Shepherd Road, Banawa, Barangay Guadalupe, nakita usab ang mga killer nga niagi.
Kini nagpasabot, matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) nga adunay nag-unang kasayuran ang gunman kon asa paingon ug asa usab moagi ang ilang target.
Dako ang posibilidad, dugang ni Parilla, nga adunay komunikasyon kang Fernandez ang mga nalambigit sa kamatayon sa abogado o aduna ba kahay naghatag sa impormasyon kanila nga naa lang sa palibot sa biktima.
“It is established nga it has contact sa atoang victim considering nga ang victim usual moadto sa area. Kon moadto man gani, walay specific time unsang orasa siya moadto. So it means aduna siyay contact nga naka monitor sa iyahang activity for that day,” matod ni Parilla.
Sa impormasyon nga nakuha sa SITG nga panagsa lang moanha sa Banawa si Fernandez, kana kon adunay importante nga tuyo sa maong dapit.
Sigun ni Parilla nga niadtong tungora, sa dihang mibisita si Fernandez sa condominium, iyang gi pick up si Rosinda Acot, real estate agent sanglit kliyente man niini ang abogado.
MOTIBO PERSONAL
Aduna usab silay gipang hoptan karon nga ebidensya nga personal ang motibo sa krimen ug way kalabutan ang trabaho sa pagka abogado ni Fernandez.
“As of now, naa tay mga evidence nga mo prove but as of now ato sa nang gi keep nga that is personal nga outside sa iyang profession,”dugang ni Parilla.
Nakuha na usab nila ang plate number sa motorsiklo nga maoy gihimong getaway vehicle sa gunman nga ila nang gipasusi sa Land Transportation Office (LTO).
Apan nagtuo si Parilla nga fake ang plate number sa motorsiklo, apan bisan pa man niini ila kining sutaon.
Samtang padayon nga gikonsidera sa SITG nga persons of interest ang upat ka mga opisyal sa Bamboo Bay condominium nga silang Beverly Dayanan, Deryl Vargas, Fabian Abalos ug Joji Tajanlangit nga ginganlan ni Fernandez sa iyang Facebook post nga maoy pasanginlan kung patyon siya.
Gipadalhan na matod pag invitation letter ang upat aron motunga sa imbestigasyon sa CCPO apan hangtod sa pag kutlo ning balita wala pa kini mosanong sa ilang awhag.
Lakip sa nadugang sa person of interest mao ang driver niini nga naigo usab sa pagpamanhig apan paaboton lang una nila kon maka recover na sa samad nga iyang naangkon.
NAG-IMBESTIGAR
Samtang ang National Bureau of Investigation (NBI) nagpahigayon sa ilang parallel investigation sa kaso.
Kini maoy gipahibaw ni NBI 7 Chief Renan Oliva sa Superbalita Cebu pinaagi sa text message sa Septiyembre 7, 2021.
Giklaro ni Oliva nga usa ka screen shot nga gikan sa CCTV sa pagpusil patay ni Fernandez ang nikatap sa social media nga hulagway sa usa ka lalake nga gidudahang may kalabotan sa pagpusil patay ni Fernandez.
Hangtod niining, pagsuwat wala pa matino ang rason sa gihimong krimen batok sa abogado.(dugang taho ni ANV)