Kapulisan sa Siyudad sa Sugbo motugot na sa leisure biking, jogging ug uban pang matang sa exercise sugod karong adlawa, Septiyembre 8, apan kinahanglan nga dili mag grupo.
Ang pagtugot pasinunot sa pagpaubos sa quarantine classification sa Siyudad sa Sugbo gikan sa modified enhanced community quarantine (MECQ) ngadto sa general community quarantine (GCQ) gikan sa Septiyembre 8 ngadto sa 30.
Apan kon dunay mga biker nga magpabadlong sama sa duha ka mga road rage sa Dakbayan sa Mandaue, morekomendar ang kapulisan sa pagpahunong niini.
Nipasabot ni Police Lt. Col. Wilbert Parilla, deputy city director for operations sa Cebu City Police Office (CCPO), nga dili mahimong mag grupo ang mag-exercise sama sa Zumba.
“Duna lang tay uban nga gipang-usab considering nga it is already allowed during GCQ just like sa mga sports. But it is only limited to biking, leisure biking is already approved but it is limited only to two person,” matod ni Parilla.
Tumong niini aron mapatuman kanunay ang social distancing.
Gipasabot ni Parilla nga “buddy system” lang ug dili mahimong mag grupo ang magbisikleta tungod kay magtapok ug magtabi inig abot sa ilang destinasyon.
Dugang ni Parilla nga sa pagtugot sa leisure biking, hugot usab nga monitoron ang bikers sa kapulisan aron dili molapas sa lagda nga gipagawas sa Kagamhanan sa Siyudad sa Sugbo.
Kon adunay mga biker nga malambigit sa road rage sama sa bag-ong nahitabo sa Siyudad sa Mandaue, dili magpanuko ang kapulisan sa pagrekomendar sa pagkanselar sa pagtugot sa biseklita.
Awhag nila sa mga mahiligon nga mag bisikleta alang sa ilang pag exercise nga mosunod sa mga lagda sa trapiko ug dili mag inisog aron walay masugatan nga problema.
Samtang dili pa una ipabalik sa ilang unit ang kapin sa 500 ka mga pulis gikan sa Regional Mobile Force Battalion (RMFB 7) nga gi augment sa CCPO ning pagbalik sa GCQ nga status sa dakbayan sa Sugbo.
Sigun ni Parilla nga magpadayon ang ilang hugot nga pagpatuman sa ordinansa sa curfew, liquor ban ug health protocol tungod kay naa pa gihapon ang coronavirus disease 2019 (Covid-19).
Subling nipahimangno ang kapulisan nga hugot pa nga gidili ang pag-inom sa mga publikong lugar, apan mamahimo ra nga dalhon ang mga ilimnon sa ilang tagsa-tagsa ka panimalay.