DILI lang ang mga higanteng Australiano ang ikaatbang sa Filipino basketball sensation nga Kai Sotto kon dili apil na ang mga higanteng Tsino sa umaabot nga season sa National Basketball League.
Kini human si Zhou Qi ug Liu Chuanxing moadto usab sa Australia para moduwa sa NBL nga maoy nakapa-interesado sa liga sanglit mag-abot ang mga batan-ong higante sa Asya.
Si Zhou, 25 gikatakdang moapil sa South East Melbourne Phoenix human wala sila magkasinabot sa kontrata tali sa Xinjiang Flying Tigers sa Chinese Basketball League.
Ang 7-foot-1 nga kanhi sakop sa Houston Rockets nag-average og 20.7 points pinaagi sa 52-percent shooting uban sa 11.9 rebounds, 2.7 assists ug 2.3 blocks per game sulod sa 32.7 minutos matag duwa.
Iyang ikauban silang kanhi mga NBA players nga silang Mitch Creek, Ryan Broekhoff ug Xavier Munford at South East Melbourne.
Samtang ang 24-year-old nga si Liu nipirma og kontrata isip developmental player sa Brisbane Bullets.
Si Liu adunay 7-foot-5 nga gitas-on ug nag-average og 9.7 puntos, 8.3 rebounds, 1.1 blocks sa Qingdao Eagles.
Ikauban ni Liu sa Australia Boomers silang Nathan Sobey, Anthony Drmic, Jason Cadee, ug former La Salle forward Taane Samuel.
Sama ni Sotto, si Zhou ug Liu nipirma ilawom sa Special Restricted Player rule nga nagtugot sa mga Asian players nga makaduwa sa maong liga.
Ang 19 anyos nga si Sotto nakabangga sa duha ka higante sa China sa ilang tune-up game sa Clark niadtong buwan sa Hunyo sa wala pa nagbuwag ang Pilipinas ug China para sa ilang pagpangandam sa Fiba Olympic Qualifying Tournament.
Si Sotto nangandam na karon para sa iyang club nga Adelaide 36ers kansang season gikatakdang magsugod karong Nobyembre 18. (PAC)