SUPERBALITA CEBU

Ciar: ‘Mr. DJ can I make a request...’

Super Ka



SILA ang mga kanhi DJ sa Sugbo nga nakahimo niadto og pangan sa radyo. Asa na kaha sila karon? Basaha ang ilang mga pakigbisog ug kalampusan sa Ssssuper Ka!

DJ RIC RYAN

Ang pangang Ric Ryan nisikat mga dekada `80 ug `90 dihang tulo pa lang ang FM stations sa Sugbo ug English paka pa ang mga DJ. Nagsugod ang iyang career dihang gikuha siya sa AM station niadto nga dyIM sa Maharlika Broadcasting System.

“Bag-o kong dayo gikan sa among probinsya sa Amontay, Nasipit, Agusan del Norte ug kay ang akong nawong tua ra magyampungad sa dyIM mao nga gikuha ko ni Rudy Ylaya nga maoy nagduma niadto sa maong estasyon. Iya kong gihatagan og slot sa hapon aron ko mabansay kay tingali iyang nakita ang akong dakong tinguha nga mahimong announcer,” balik-lantaw ni Enrico Cardoniga sa tinuod nga kinabuhi sa Superbalita Laysho.

“Samtang si Dodie Roz nga consultant sa WEA ug maoy production head sa dySS ang nihatag nako og break aron mahimong parte sa roster of DJs sa music station nga dySS-AM uban nila ni Jojo Banana, Cue Breaker, Good Times Charlie, Big A Bryan ug Mario Lopez. Dihang napalit sa GMA-7 ang FM station nga 99.5 RT, ang line-up sa mga announcer sa dySS nabalhin sa 99.5 RT,” dugang ni Cardoniga.

Apan naputol ang iyang career sa radyo dihang nakahimo siya og “mortal sin” sa broadcasting human wa tuyoang iyang na-mention ang ngalan sa competing brand atol sa iyang pag-emcee sa usa ka TV show nga gihulagway niya nga dili niya makalimtan sa tibuok niyang kinabuhi.

“Dihang naundang ko sa radyo, dinhi nako nakat-unan ang pag-mix og disco songs sa pagtudlo ni Max Doria sa dihang buhi pa ni. Dinhi nako nasuwayan nga motrabaho sa After Six Super Club, St. Gotthard Disco ug BAI Disco sa Cebu Plaza Hotel.”

Paglabay sa usa ka tuig, si Ric Ryan nakabalik ra sa radyo sa imbitasyon sa iyang higalang si Rex Ricarte nga maoy nagdumala niadto sa dyBU-FM. Ug dihang natukod ang 92.3 Killer Bee niadtong 1992 nahimo siyang station manager hangtud 2002. Nakatrabaho pa siyag kadiyot sa Home Radio sa wa pa siya nibiya ug nilangyaw sa Saipan niadtong 2003.

“Sa Saipan nakatrabaho ko isip resident DJ ug event organizer sa Gig Discotheque for five years. Apan tungod sa recession nibalhin ko sa Dubai ug wala koy kalibutan nga nag-recession pud diay niadtong tungora. Maayo na lang kay gitabangan ko sa akong higalang si Arnel Armamento nga DJ sa Dubai Eye sa Dubai nga nanag-iya sa Filipino Expat Magazine.”

Sa pagkakaron si Cardoniga dunay mabulukong career isip Ad and Promo Manager sa Day To Day Hypermarket sa Dubai ug ang bakanteng oras iyang gigugol sa serbisyo publiko isip founder sa Facebook page nga Tatak Pinoy Loud & Proud diin kada semana siya mohatag og motivational talks sa mga MLM (multi-level marketing) companies.

Gi-promote usab niya karon ang iyang libro nga “The 12 habits of highly successful OFWs” nga nagtudlo sa hustong pagdumala sa panalapi alang sa haruhay nga kinabuhi.

DJ PATRICK STARR

Si Patrick Irwyn Suarez nigradwar sa BS Mechanical Engineering sa USJ-R batch 2000 ug ni-proceed pa sa Industrial Engineering apan wala na niya matiwas kay dinhi na nagsugod ang iyang popularidad sa radyo.

“Nagstart ko sa broadcasting way back November 1999. Ni-audition ko ni Mr. Rino Bonilla, ang station manager at that time sa Home Radio didto pa sa Busay. Daghan kong managers naalagaran sa Home like Douglas Capulla, Rico Cardoniga ug Manny Galicia. I worked there for six years.”

Nakatrabaho usab si Patrick sa Wild FM, Ultimate Radio ug sa Love Radio 97.9 diin siya nailhan sa air name nga Matthew Dancer. “Sa Love Radio gyud ko nagdugay for almost 14 years. Dako akong pasalamat sa station manager nga si Sir Ayie Lanza sa gihatag niyang oportunidad.”

Si Patrick usa lang sa mga nagkadaghang radio personality sa mainstream nga nibalhin na sa online. Ang iyang programang “Night life with Patrick Starr” mabati from 9pm to 11pm Lunes hangtod Sabado. Live usab ni sa DanceRadio 90.5 Santo Tomas Davao, 102.9 DanceRadio Carmen Davao del norte ug sa Cebu DanceRadio Southside.”

“Naa pud ko sa Island Radio online nga gipanag-iya ni Sir Gilbert Gonza nga kauban ra pud nako sa una sa Love Radio, ang ‘Bira Kabangag Show’ nga mabati kada alas 8 sa gabii kauban silang DJ Titing ug DJ Tamsi Supsup. Mo-earn mi through commercials and sponsors. Mas wide among market kay ang among listeners or viewers not just Cebu but even abroad.”

Si Patrick nag-sideline usab sa sales and marketing ug aktibo sa hosting sama sa preliminary draw sa Jimms Coffee.

Apan duna siyay sipat nga kasinatian sa radyo nga matod niya dili gyud niya makalimtan. Kini dihang nibisita sa iyang programa si Lovi Poe ug kay wa mogana ang microphone sa aktres nagsawo na lang sila sa iyang mic.

“Nagtupad mi sa lingkuranan kay gamay ra man ang space sa studio, nagtabang mi sa usa ka mic ug duol kaayo among mga aping as in super close jud,” ni Patrick nga naila usab nga komedyante.

Si Patrick Starr mabisita sa iyang fan page nga danceradio xugbu socials@danceradio875 ug sa website nga www.danceradio875.caster.fm.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!