MAS mubo ug sayon nga arrival protocols ang ipatuman sa Kagamhanan sa Lalawigan sa Sugbo alang sa mga mopauli nga overseas Filipino workers (OFWs) ug returning overseas Filipinos nga fully-vaccinated na.
Sa kasamtangan mopaubos sa swab upon arrival ang mga pasahero ug ipaubos sa pito ka adlaw nga quarantine subay sa Inter-Agency Task Force (IATF) protocol.
“Vaccination is a matter of choice it should not be punitive it should be incentivized,” matod ni Garcia, alang sa mga Sugboanon nga mopauli.
Apan sa gihapon kinahanglan kini nga ipaubos usab sa ikaduhang swab test sa ikalima nga adlaw sa ilang kwarantina.
Gisugyot usab kini ni Garcia sa mga opisyal sa Department of Tourism (DOT), Department of Health (DOH), Bureau of Quarantine (BoQ), Hotel, Resort, and Restaurant Association of Cebu (CHAC), ug Overseas Workers Welfare and Administration (OWWA) atol sa tigom niini.
“Can we not add this as a further incentive for vaccination so that fully vaccinated persons who arrive will be given priority in the testing sa lab? So, that as much as possible we will try to come out with that result on that same day so it shortens the 7-day stay,” matod ni Garcia atol sa tigom.
Sa IATF, kinahanglan huwaton pa ang ikapito nga adlaw una pa i-swab test ang usa ka OFW ug ROF.
Matod sa gobernador nga gikatakda nga moluwat siya og bag-ong memorandum kalabot niini.
Base sa mando, mopaubos sa ika-duhang swab test sa ikalima nga adlaw sa pag kwarantina ang mga mopauli nga Sugboanon gikan sa gawas sa nasod.
Kon fully-vaccinated na ug negatibo ang resulta sa swab test, mamahimo na nga makagawas sa quarantine area sa ikalimang adlaw.
“Can we put that now as a matter of protocol that fully-vaccinated persons will be swabbed early in the morning on the fifth day and the test results will come out by the afternoon so that they can leave upon a negative test result,” nagkanayon ang gobernador.
Ang BOQ mao usay gitahasan nga mohimo sa verification process sa mga dokumento nga ipresentar sa mga fully-vaccinated ROFs ug OFWs.
Ang mga ROFs mamahimong mopresentar sa ilang vaccination card, government certification of vaccination o International Certification of Vaccination (ICV) nga giisyu sa BOQ.
Samtang ang mga OFWs mamahimo nga mopresentar sa ilang Philippine Overseas Labor Offices (POLO)-Verified Vaccination Card o Government Certification of Vaccination sa ilang pag-abot sa airport.