KARON nga gipaluagan na ang quarantine status sa dakbayan sa Mandaue, gitugotan na ang mga negosyo nga mudawat og 50 ngadto sa 100 porsyento sa ilang kapasidad sugod sa Septiyembre 8, 2021.
Kini human nagpagawas si Mayor Jonas Cortes sa iyang bag-ong Executive Order (EO) 31 series of 2021 sa Septiyembre 7 alang sa mga sumbanan sa pagpatuman sa general community quarantine (GCQ).
Alang sa mga food establishment nga adunay al fresco dining, gitugotan na makadawat ngadto sa 75 porsyento sa kapasidad samtang sa indoor dining mamahimong maka-akomodar ngadto sa 50 porsyento sa kapasidad.
Matod sa maong EO, ang mga establisemento nga wa tugoti ubos sa enhanced community quarantine (ECQ), gitugotan na sa pag-abli ug makapasulod na og 50 hangtod sa 100 porsyento sa kapasidad niini.
Apan, giawhag gihapon ni Cortes ang mga negusyante nga ipatuman sa ilang mga trabahante ang work-from-home ug remote work arrangement.
Kon ang usa ka negosyo adunay Safety Seal Certification, mamahimo kining mopasulod og dugang 10 porsyento sa gihatag nga kapasidad niini, saysay sa maong EO.
Ang certification giganti sa Mandaue Investments and Promotions Action Center (MIPAC) ug Business Permit and Licensing Office (BPLO) alang sa mga negosyo nga motuman sa mga sumbanan nga gipatuman sa gobyerno karong pandemya.
WA TUGOTI
Wa gihapon tugoti sa pag-abli ang mga entertainment venues, recreational venues, amusement parks, casinos, ug mga contact sports, saysay sa direktiba ni Cortes.
Sa laing bahin, nitugot na sab ang Siyudad nga 30 porsyento na ang tugotan nga motambong sa mga haya ug lubong lakip na ang pagbisita sa mga sementeryo ug kolumbaryo.
Samtang, 30 porsyento sa kapasidad nasab ang gitugotan nga motambong sa bisan unsang mga relihiyosong aktibidades sa dakbayan sa Mandaue.
Gawas sa maong mga direktiba, susama gihapon ang mga sumbanan nga gipatuman sa dakbayan sa Mandaue lakip na ang curfew, liquor ban ug uban pa. (KFD)