KADUHA na nahitabo ang road rage tali sa mga siklista ug mga drayber. Sa duha ka mga insidente, pulos agresibo ang mga siklista sa ilang pagkomprontase sa mga drayber. Maayo gani kay sa ikaduhang insidente, kalmado ra ang drayber bisan nanghagit og sukmagay ang siklista nga dunay mga kauban.
Sa unang insidente, agresibo ang mga biker tungod sa kalagot. Giingon nga ang usa sa mga babaye nga biker naaksidente tungod sa pagpasagad og padagan sa drayber sa traysikol nga gigamit sa paghatod og pan. Sa ikaduha, nangasuko ang bikers nga gibusinahan sila sa drayber sa multicab kay nakababag sa dagan sa trapiko.
Kining sinyagitay sa karsada di ni bag-o. Karon lang nga bikers ang nalambigit kay daghan na ang manikad sa karsada panahon ning pandemic. Bisan asa ka, norte o south, magpanon ang mga nagbiseklita.
Sa duha ka mga insidente, ang una masabtan ang ilang kasuko sa drayber kay kon tinuod nga dunay nadisgrasya, natural kini nga reaksyon. Apan madala ra baya og estorya pinaagi sa pagpahibawo sa drayber nga tungod sa iyang pagpasagad sa pagmaneho, dunay naaksidente, inay sukmagon. Mahimong gireklamo og reckless imprudence aron makamulta o silutan.
Sa ikaduhang insidente, di kadto angay unta ikasuko kay kon tinuod nga nakababag sila, natural lang nga businahan. Ngano mang mag-estorya nga magtupad sa karsada samtang nagbiseklita? Hagip-ot na gani ang dan, samotan pa nga babagan sa hinay kaayong nakapadagan nga siklista.
Mahimo ra man gud nga mag-estorya unyag abot sa destinasyon o sa dapit nga hunonganan alang sa pagpahuway. O dak-on lang gud ang tingog aron magdungog.
Ang karsada wa gipanag-iya ni usa o pipila lang ka mga tawo. Iya kini sa publiko busa angay nga maghatagay og dan.
Diha sa karsada angay magrespetahay aron way magsukmagay. Estoryahan kon dunay nasayop. Di ipatigbabaw ang kasuko.