Nalzaro: Salida ni Ahong ug Mike
KON sa eninglis pa, sila si Cebu City Vice Mayor Mike Rama ug Lapu-Lapu City Mayor Junard ‘Ahong’ Chan have one thing in common. Unsa man? Pareho silang mopakita og salida ngadto sa publiko. Ambot kon sinsero ba sila o ba kaha pustora lang alang sa pamulitika. Karong bag-o, nag-viral ang hulagway ni Mayor Chan nga nagmasa og semento aron itapak sa mga libaong sa kalsada. Gikapoy siguro, nakita nga nagyaka ra ang mayor sa sidewalk nga nagkaon og pan. Kon ato lang tan-awon ang hulagway nga taphaw o at face value, makadayig kita sa gihimo sa mayor.
Samtang mihimo sab og salida si Vice Mayor Mike Rama. Ambot kon nag-viral ba to sa social media ang ‘amard’ (drama) ni Mike. Nakita siya nga naglingkod sa hagdan sa City Hall lobby nga morag namirma og mga papeles. Unya sa iyang luyo adunay lamesa nga kolor green. Unsa may buot ipakita sa bise mayor sa maong hulagway ngadto sa publiko? Iya bang ipakita nga nagtrabaho siya? O iya lang kadtong salida aron dayigon siya?
Sama niadtong iyang gihimo kaniadto nga nagsakay-sakay og kalesa ug jeepney ug mihigda sa lantay sa Carbon market. Nagpasinguwan samtang nag-traffic taliwala sa kalsada. Morag si Mar Roxas niadtong midagan sa pagka-presidente. Diha pay panahon nga midiskorso siya, naghubo sa iyang barong ug nagluhod-luhod ibabaw sa stage. Mahilig nig drama si Mike. Unya matag himo niya sa iyang drama, makuhaan ra ba og hulagway unya i-post sa social ug mainstream media. Ambot og iya bang gisabot ang mga photographer o sulagma lang nga naay photographer.
Pero ang mga reaksiyon sa mga netizen halos tanan negatibo. Nahulog nga gibugal-bugalan na hinuon siya. Hinuon, adunay midayig ug nagkanayon nga ‘pagka-but-an gyud ni Mike’ kay bisan sa kalisod sa situwasyon, motrabaho gihapon. Ambot lang kon unsay nasulod sa utok ni Mike. Nagdrama o paukyab ba?
Sa dihang nahimong acting mayor si Mike, mas daghan ang press conferences o photo opportunities kay sa trabaho. Aw, iya man nang ampay. Basta makatabi lang na siya, okey na gyud. Mobutho man lang gani na og kalit sa news and public affairs radio stations ug mobulontaryo pagpa-interview. (bobbygnalzaro@gmail.com)